jimmycmlin的部落格

台語文：卜卦

來喔！來喔！

抽籤卜卦，測運途，知未來，閃厄運，遇貴人⋯！

自早以來，祭拜問神算命測未來時，攏會用著堅橂龜殼做的卦板來占卜.卦板是愈用愈烏金，使用的時間亦可能比長歲壽的龜命閣較久長。

俗語講：人死留名，虎死留皮。對龜來講，龜殼做的卦板會當傳承閣較久長，可能亦是真榮譽的代誌。

毋過，抑是有機會當面問龜，問伊講：用你的龜殼做卦板，用佇問神祭拜算命測未來等等，又會當用久長攏袂歹去，你有感覺非常榮幸？真歡喜否？

料想袂著，龜的回應是講：

我的動作雖然是慢慢仔趖，毋過，我每工攏真自由自在，行東往西，看天氣千變萬化，看我的心情，喜怒哀樂的起落，隨意隨緣隨時攏方便；欲去水底浸涼，揣魚、蝦、蟹做伙耍，欲去草仔埔吹涼風、曝日頭，聽樹仔頂的鳥仔唱歌，蟬聲合鳴，上自然的音樂；講故事予龜仔囝孫聽；遇到危險的時，有位通覕著覕，抑無，頭仔尾佮四跤勼入龜殼內，共款會當閃避危險期。會當活到幾歲，he 是我的天命，無怨無悔。

抑是，去予人掠去做卦板，得先犧牲我的生命，一切攏烏有去囉！按呢並毋是我所愛的目標啊！