用藥保健~~~~~CPR(施披壓)~~~~~遊子
俗語講：救人是存在一念之間，救命是要有一技在身‧有影喔！拄到身邊的人發生意外時
，抑是無二步七仔，準做有心欲救伊，嘛毋知按怎出跤手耶！咱嘛定定看到有人以CPR(施
披壓)救起袂少人的報導，不過，可能猶有真濟人無瞭解什麼是CPR(施披壓)？
CPR(施披壓)是Cardio-Pulmanary Recover的縮寫，華語翻譯做心肺復甦術‧
CPR(施披壓)使用的時機是：發生意外的人猶袂做死亡的確定，親像心臟病發作、落水溺水
、藥物過量、傷過緊張刺激等等，引起心臟暫時無跳動，無法度喘氣的時陣‧一般超過4~6
分鐘時，咱體內的氧氣就差不多消耗完啦！抑是達到10分鐘時，這個人就差不多變成腦死的
狀況啦！所以，佇救護車猶袂到時，一定需要在場的人先來急救‧
CPR(施披壓)施行的步數：
預備動作：叫、叫、A、B、C‧先連續拍佮叫發生意外的人，檢查心臟有跳動無？有喘氣無
？抑是，攏無反應，無心跳、無喘氣，叫邊仔的人緊拍119求救，由會曉CPR(施披壓)的人
隨進行急救‧
急救時第1步：拍開發生意外人的呼吸道，避免患者的喙舌塞著呼吸道，會造成無法度喘氣
來死亡‧
急救時第2步：檢查心臟有跳動無？聽看有喘氣無？倚看鼻孔有出氣無？大概5~10秒的檢查
，判斷是毋是有正常的心跳佮喘氣？
急救時第3步：以手掌的掌根來按壓患者的2爿奶頭連線中間的胸骨所在，連續按壓30下，續
落來對患者的喙撥開，歕2口氣入去，就照按呢，以按壓30下歕2口氣的順序，連續做落去，
寬寬仔做，力頭毋通傷大，嘛毋通傷急‧
急救時第4步：歕氣時每口氣差不多是1秒鐘，連續做到患者醒過來，亦是救護車到位時才轉
送去病院‧
一般社區民眾會使集合30人以上為1個團體，向恁蹛所在的消防隊亦是紅十字會連絡，申請
免費的CPR(施披壓)教學課程‧以前學過的人，可能日久無用會生疏，嘛會使倒返去複訓，
才袂誤到急救的時機‧俗語有講：倢講喙會順，倢做手袂鈍‧
留言列表
