jimmycmlin的部落格

用藥保健~~~~~轉化症~~~~~遊子
看到媒體報導：有人因為壓力傷大，造成目睭看物件才變色去---‧醫生講這算是醫學上的
轉化症‧不過，咱一般人毋知影什麼是轉化症？
轉化症其實佇古早就已經有啦！佇古早的西洋醫學中屬於歇斯底里(Hysteria)病症的1種；
主要表現出來的症頭有：突然間變成無力、軟sio sio，目睭看無物件(失明)，勼筋，無法
度開喙講話等等，是以感覺運動系統方面的無正常，佇症頭出現前定定會先發生內心衝突的
事誌，表現出來的症頭又無法度以任何已知的病症去解說‧
依據研究報告：查某的發生率比起查埔的較懸2至5倍，較倢出現佇青春少年期的時陣，另外
，佇莊跤所在、教育程度較低、社會經濟地位較低、亦是面對戰場的兵仔等等，攏是較會出
現的族群‧不過，嘛有細漢囡仔發生的病例‧
佇頭1擺發病中，大部份的個案攏會當佇短時間內改善，嘛有75%的患者袂閣再發作，抑準出
現症頭的時間牽拖愈久，治療的效果愈無通好，後來，症頭的出現會變成患者利用來滿足心
內願望亦是逃避日常生活責任的理由藉口‧
所以講轉化症是個人的身心受到真大的壓力亦是心理比較卡閉思來引起，上好要予精神科醫
生來瞭解診斷閣治療，只要患者的壓力會當解除，症頭自然會消失去，續落來接受心理適當
的輔導開引，經過一段時間了後，空喙就漸漸無去，嘛會使恢復正常‧