台語文~~台鐵郵輪列車遊記~~遊子 2014.03.28.
頂個月中參加過台汽的國光假期去武陵農場賞櫻花，感覺旅遊品質袂[禾黑]，想講換來參加台鐵郵輪列車的行程看mai7；郵輪列車有1工、2工佮3工無共的行程，過去的經驗聽講開放網路報名後隨”秒殺”，表示真搶市喔！
牽手看到郵輪列車花蓮1工的行程，阮的都合亦會拄仔好，隨上網報名，搶到2位名額，是莒光號的票價，毋過，由樹林站出發只停留板橋、台北、松山直接到花蓮，比自強號閣較緊！佮台汽的國光假期相共，亦有提供65歲以上的半價優待喔！
阮又閣一擺坐透早頭班電車去樹林站換車，專車有4台車廂，嚴格限制無票的人上車，由樹林站準時出發，準時到各站接人客，差不多有9成外的遊客，7成外看起來是退休人士，賰的就有少年的佮細漢囡仔。
一路順序，來到冬山站特別歇睏12分鐘，予所有遊客下車欣賞咱台灣唯一的瓜棚式月台，有影是真正有特色的建築結構美學。續落服務人員佇各車廂分配接駁的遊覽車順序佮接受人客注文回程暗頓的鐵路便當，每個80箍，隨意無強制，因為今仔日總是三頓自理啦！
準時到花蓮站，佇後站出口已經有6台遊覽車等待囉！每人需要閣繳350箍的車錢，規陣隨往頭一個遊覽點”勝安宮”，續落去市區顧腹肚，出名在地美食真正濟：扁食、包子、鵝肉、粉圓、西瓜盤-----等等；土產有：花蓮薯、花蓮竽、玉里羊羹、花蓮餅、玫瑰石---等等。續落繼續往南來到藏覓佇鳳林山跤的”林田山”，是日本時代剉柴工作人員所蹛的莊頭部落，原本叫做”森阪”(Morisaka)，華語翻譯做”摩里莎卡”，園區保留著非常完整的木材建築物：檜木所起的集會堂、宿舍區、火車頭、鐵枝仔路、涼亭仔、倉庫、場長宿舍亦是全用檜木所起日本式的茨、集柴機、原木雕刻品---等等，保持著上原始的山川景緻，植物自然生態；園區有淡薄仔親像北部的”九份仔”，所以，亦予人叫做”小九份”。
上尾仔遊覽車來到”雲山水”，遮是私人的莊園，園區有真嫷的別莊，亦有4公頃闊的湖，配合著環境植物予人感覺親像佇夢境內，所以，亦予人叫做”夢幻湖”；天氣好的時，湖面映對著藍天白雲，水面渡鳥優游，尖茨頂的別莊，青色的樹林佮草仔圃，予人真正清幽、恬靜、放鬆的感覺。
台鐵郵輪列車的品質算袂[禾黑]，毋過，亦有改進提升的空間，親像講：車內服務人員放送的內容會當閣較詳細紹介，聲調會當閣較有感情，暗頓的鐵路便當，其實亦有100箍的菜色比80箍較好，會使增加予人選擇，景點停留時間的長短，亦會當調整----等等；最後講來郵輪列車花蓮1工的行程是”俗閣大碗”啦！另日有機會才閣來搶2工佮3工無共的行程啦！
留言列表
