jimmycmlin的部落格

莊子講(53)~~~甘泉先竭~~~遊子
孔子帶弟子周遊列國時，有1次被困在陳蔡的中間所在，連續70工糧食無夠食，定定是有1頓無1頓；
脫困以後，大公任前往問候‧
大公任講：你即擺差一點仔就遇害無救啊！
孔子應講：是啊！
大公任又講：以前我毋是有對你講過避免受害的道理？東海有1隻鳥仔叫做意怠；平常時即隻鳥仔看
起來無什麼本事，佇天頂飛的時，攏綴在cua頭的鳥仔後，佇路途中歇睏時，嘛攏一定藏在鳥仔陣內
，有物件通食的時，嘛毋敢搶頭前去食，所以，自頭到尾攏無人會去傷害到伊‧咱看生做直又懸又粗
大的樹仔叢，一定先予人剉去用，水質甜又甘的清泉，一定先予人汲乾共款，這是真淺又明白的道理
啊！即馬，你的行為就真親像提著智慧的光華，欲去照出別人的污濁缺點，你正經照按呢做，別人當
然擋﹝勿會﹞diau，一定無法度忍受你、容納你啦！
孔子聽了後心內大大的覺悟，就隨辭別朋友、弟子，家己孤獨1人去深山林仔內，專心誠意去修道‧
所以講：有才華、智慧時，毋通外露，傷過張揚囂俳，抑無，別人知影，毋是驚你就是怨妒你啊！錢
銀嘛是毋通露白，抑無，可能會破財受到傷害喔！