(耐佳拉大水淌Niagara Falls)
台語文~~~~~美加東旅遊記(2)/大水淌~~~~~遊子 2008.06.07.
這次的美加東旅遊總共去觀賞3個所在的大水淌”(tua7-tsui2-tshiang3)；大水淌就是
華語所講的”瀑布”，亦是佇英語所講的”Fall”，亦是佇日語所講的”瀧 /taki”，這嘛
予咱閣1擺驗證瞭解，相共的1項物件佇無共族群所講的發音是無共的事實‧佇咱台灣烏來
的水淌算是尚出名，其他亦有桃園縣北橫公路小烏來的水淌、宜蘭縣五峰旗水淌等等，毋過
，攏親像囡仔佇放尿，細港仔細港爾爾，所以，這次有影是大開眼界啦！
(1). 耐佳拉大水淌(Niagara Falls)：Falls表示2個以上的數目，華語叫做尼加拉大瀑
布，台語叫做耐佳拉大水淌；其實總共有3個做伙，位佇美加交界的所在，源頭來自Ottario
湖流入Niagara River，經過地面斷層造成真大的河床懸低落差，造成世界奇景之一的耐
佳拉大水淌；每年6月至10月是水量上大上壯觀的時陣，佇邊仔欣賞著水聲，親像千軍萬馬
佇走tsong5的聲勢，日時觀光客坐”霧中少女號”(Maid of the Mist)遊艇遊覽，每人
愛穿簡單型的雨衣，因為遊艇行倚大水淌時，水氣衝撞附近地區，予人感覺親像佇大風雨內
底，抑準無穿簡單型的雨衣，規身軀絕對tam5糊糊啦！企佇船頂感受到大水淌的水氣，實在
是真難得的機會啦！大水淌的闊度是烏來水淌的幾仔百倍，無底比啦！暗時9點以後，配合彩
色燈光照射變化佮天頂放煙火表演，溪邊公園亦有音樂演唱，予人感受到佮日時完全無共的氣
氛‧到半暝，大大細細無共人種的觀光客猶原非常濟，實在讚啦！聽講寒天時，正中央的水淌
袂結冰，毋過，邊仔水量較細的部份佮河底部份就變成白茫茫冰的世界囉！
第2工早起安排佇第33樓食早頓，規面透明的玻璃窗，看出去就是耐佳拉大水淌，亦有大水淌
頂的耐佳拉河佮河流中細粒島，哪食早頓哪欣賞耐佳拉大水淌的嫷景緻，嘛是有史以來頭一擺
的經驗，逐家攏感覺非常價值啦！
因為位佇美加交界的所在，美國的州政府認定為保護區，盡量欲保持原樣到永遠；加拿大的省
政府認定為觀光區，所以，大飯店、觀光懸塔、賭場、娛樂場所、餐廳、藝品紀念品店、公園
等等，鬧熱滾滾，觀光客親像流水非常濟，新建設亦一直佇增加中，美加兩爿的管理方式無共
，造成兩爿的景況完全無共，對以後來講，嘛毋知到底兜一爿的政策才是對的？
(含情脈脈大水淌)
(2).含情脈脈大水淌(Mintmorency Falls)：位佇Montreal無若遠，伊懸低落差是耐佳拉
大水淌的1倍半，懸度達到83公尺，雖然，知名度比袂到耐佳拉大水淌，毋過，臨場的聲勢猶
原真正大；佇大水淌對爿的山頭仔，景色親像咱台灣南部的月世界，無毛無毛，山坪仔的登山
道有487崁，愈(足百)愈懸，有高山症的人可能就無法度行到上頂懸，山跤、半山腰、山頂分
別起有3間涼亭仔，予遊客由無共懸度佮角度來欣賞大水淌；另外，嘛有起1座流竉，予跤力無
夠的人，猶原會使到頂頭去欣賞大水淌，實在方便啦！
(聖安妮峽谷)
(3).聖安妮峽谷(Sainte--Anne Canyon)：懸低落差自然造成出3位無共的大水淌，嘛起有
3座吊橋跨過雄雄的水流頂面，行過吊橋時，頂仔下仔攏是隆隆叫的水聲，較無膽的人是真驚
惶喔！峽谷的部份路段，感覺和咱台灣東部的太魯閣峽谷非常相共，水勢是較輸面，毋過，山
壁大理石的石勢就較贏面啦！和前仔寫過的水淌共款，空氣中的水氣，雨日頭照到，攏會出現
7彩的虹，非常嫷來映對雪白的流水佮青翠的草木中，予人感覺心涼脾肚開，規身軀來放輕鬆
啦！
全站熱搜
留言列表
