jimmycmlin的部落格

台語文~~~~~大烘爐~~~~~遊子
大寒的時陣，寒流一波強過一波‧
溫度一度一度一直降‧
外頭冷咻~~咻~.
互人寒甲強﹝要卜﹞擋﹝勿會﹞﹝止周﹞‧
這當陣，大烘爐上好用‧
外緣厚厚面悠悠‧
腹肚大大內粗粗‧
喙仔闊闊底平平‧
內底囥著半滿的砂仔灰‧
對中的火炭火，穩穩仔燒‧
炭火頂，囥一個鐵仔架‧
鐵架仔頂會當互茶壺坐‧
燃一壺燒滾水來泡茶‧
抑是﹝火君﹞一鍋仔甜甜的紅豆仔湯‧
鐵架仔頂嘛會當鋪鐵線網仔‧
佇網仔頂烘甜糕，烘柔魚仔絲‧
香味香絳絳，鼻到喙瀾水就強﹝要卜﹞流落來‧
烘爐內面四箍輪轉，嘛會當烘蕃薯喔！
大人的粗皮手，幼綿綿的囝仔手‧
双双對對倚佇烘爐的外壁面‧
燒~~~燒~~燒!一點仔嘛毋驚寒‧
逐個坐佇烘爐邊，開講講古說天地‧
趣味膨風加減撽，祖公仔代誌講﹝勿會﹞煞‧
囝仔人聽甲耳仔﹝ㄔ奇﹞起，喙仔開開，目睭無﹝目聶﹞‧
那講、那聽、那笑‧
又搁有庶﹝食羞﹞仔點心通享受‧
這個時陣，什物寒？什物冷？
攏嘛走甲無看到影‧
這個氣氛，嘛是逐個上歡喜的時陣‧
即馬時代改變‧
科技進步，新產品濟‧
燒氣機電暖爐滿滿是‧
一項一項來上市‧
逐家感覺古早的古董烘爐真費氣‧
漸漸將伊放﹝勿會﹞記得‧
實在講‧
大烘爐卡趣味佮有意義‧
大烘爐正是阮甜蜜的回憶‧
一直到即馬‧
阮攏嘛抑佇懷念伊~~~!