台語文~~~~~美加東旅遊(3)/北國之春~~~~~遊子 2008.06.07
加拿大西部的溫哥華(Vancover)佇”64天安門事件”hit年去過，算起來嘛將欲20冬囉！
這擺換來東部地區，包括：Niagara city,Toronto,Montreal,Quebec等等大細城市，
因為緯度較懸，1年中有6個月以上是冰天雪地的環境，規年的溫度是由30~零下30度喔！
現此時正是春天，所看到佮經過非常青翠的所在，無若久前仔，猶攏是規片雪白的景象，
這對咱蹛佇亞熱帶的人來講，聽起來是真趣味、真稀奇好耍；毋過，對蹛佇遮的人來講，
是真無方便喔！親像：零下20~30度的天氣，路面積雪真厚，有時比人較深，除雪車規工
無停來除雪，才勉強維持2線道的路痕予車輛來往，除雪後隨綴著撒鹽，保持路痕袂結冰
變滑，雖然按呢，車輛來往猶原非常危險，開車的人攏愛真細膩，抑無，連環車禍隨時會
拄到，隨處看惠到；家家戶戶嘛每工拍拼除去隨戶茨前的積雪，抑無，會發生意外事件；
大細湖面嘛攏結冰囉！居民愛佇結冰進前，將碼頭邊所有船隻遊艇遷徙去岸邊的倉庫亦是
安全的陸上，抑無,船隻遊艇會報銷去‧日常生活對大人囡仔攏加真無方便‧當然，這種
環境嘛有好處，造成寒冬運動項目真流行佮熱烈，培養出非常濟的高手，溜冰、冰上芭蕾
舞、滑雪、雪車等等，佇世界運動會時得牌出名‧
Ottario湖(華語叫做安大略湖)是美加交界的5大湖之一，面積比台灣閣較大，由湖面看
過無法度看到對岸，親像大海洋共款；湖的北爿有Toronto，是Ottario省上大的都市，
人口有450萬外人，佔Ottario省人口的4成外，有真濟亞洲移民蹛佇遮，台灣人干呢嘛袂
少，市內的CN Tower(Canada National Tower;西恩塔)是全世界上懸的高塔，有高速
電梯通去頂頭遊覽，咱台灣的101大樓是目前全世界上懸的摩天大樓，CN Tower是比101
大樓閣較懸的高塔，佇頂頭遊覽時，有一大片地板改做透明安全玻璃，企佇透明安全玻璃
看倒落去，實在真刺激，有懼高症的人吱吱叫，連倚過看嘛毋敢，阮牽手嘛是其中之一啦
！
Thousand Islands(千島群島)是位佇Ottario湖注入聖羅倫斯河的所在，依據美加2國
所調查總共有1865個大細粒島，寒天湖面會結冰，春尾開始才有行渡船、遊鋌佮私人船隻
，其他有美加2國上短的國界，就是2個島中間的橋，只有6公尺半爾爾，有真濟島是賣予
好額人，隨人設計佇島上起無共特色的建築物，彩色的茨、城堡、花園等等，配合著青翠
的樹林佮暗青的水面，天頂有時嘛看到直昇機飛來飛去，遠遠看去像田嬰仔的款，坐遊艇
佇遮親像有生活佇童話故事內底的感覺，予人像佇做夢共款啦！
Montreal(華語叫蒙特婁)，當地華人叫做”滿地可”，是起佇河流中間的大粒島頂頭，
人口有280萬外人，比台北市閣較大，嘛舉辦過世界奧林匹克運動會喔！運動會館斜斜的
電梯設計，後來變成觀光遊覽的所在，是加拿大國內法國人上濟的Quebec省的上大都市‧
習慣上叫做法語自治區，全區人口有700~800萬人，有影喔！佇市面街仔路的看板、廣告
牌、路標等等，以法文為主，有寡仔是法文佮英文併存，觀光客濟的所在才有聽到講英語
，講起來講法語的加拿大人嘛真團結，逐家嘛攏尻川拾(khio3)做伙，所以，Quebec
Party(魁北克黨)佇遮是一檔獨大，無人佮伊通比‧市內的聖約瑟夫大教堂`是魁北克省
3大宗教巡禮地之一，名聲透全國‧
Quebec City是友500外年歷史的所在，比美加2國的建國歷史閣較久遠，是北美洲唯一猶
保留著古早城牆的城市，毋哪是古蹟，又閣予聯合國認定為世界性遺產；市內有古戰場、
砲台、兵器廣場、古城、城堡等等，攏已經變成觀光鬧熱的所在‧規的魁北克市完全是歐
洲法國巴黎的縮影，芳堤娜城堡飯店是唯一5粒星級的飯店，查埔查某的服務生，攏妝扮做
古早的法國式，予人佇飯店內親像倒轉去幾百年前的法國囉！小香普蘭街仔路完全是保留著
古早味，石板路、尖茨頂、藝術的窗仔門框、趣味的看板等等，是觀光客一定行跤到的搶市
熱門點，所以，遮嘛是美國人真愛來享受純歐洲法國巴黎氣氛的所在，毋免坐飛機過大西洋
就會使享受到，算是近閣方便啦！
全站熱搜
留言列表
