jimmycmlin的部落格

台語詞句的本意(3)~~~~~等路佮伴手~~~~~遊子
佇生活上定定有聽到“等路”佮“伴手”這2個名詞，到底是有什麼無共款？
叨一個是人客提來的？叨一個是﹝要卜﹞送互人客的？
古早交通無方便，親朋好友的交往拜訪，大部份攏是行路，準做有坐車抑是坐
船，落車落船了後，嘛攏愛搁行一段真遠的路；親像：阿舅仔﹝要卜﹞來阮兜
tit- tor，時間抑是差不多阿，阮阿母就會叫阮去外面路頭等阿舅仔，cua阿舅
仔來阮兜，古早無手機仔，到的時間無得確；盼阿盼！望阿望！阿舅仔來囉！
阿舅仔手捾大包細包的物件，歸面大粒汗細粒汗，喙仔笑嘻嘻，看到阮就講：
來，來！踮hiah等真久阿哼！一寡仔“等路”互恁，緊來提‧所以，“等路”
是人客來咱兜帶來的禮物‧
“伴手”又是安怎講？搁用頂仔的例來講，阿舅仔佇阮兜蹛一暝，隔工﹝要卜﹞
走的時，阿爸阿母就會去田挽幾項的果子和青菜，佮用茭芷袋仔貯一隻土雞仔，
提互阿舅仔講：這一屑仔物件，無成敬意啦！互你做“伴手”，陪你轉到茨‧因
為，双手空空無好看，這嘛是做主人對人客的尊重‧
即馬，咱就知影“等路”佮“伴手”這2個名詞，是互相禮尚往來，有來有去的
好風俗‧是值得咱來繼續保存落去‧