台語詞句的本意(4)~~~~~拍拼~~~~~遊子 10外年前開使流行的台灣歌曲“愛拼才會贏”，毋管是選舉時，公司開會了
的食飯餐會，社會團體的活動抑是學校的活動，攏嘛真流行，真正熱門‧這
條歌是鼓勵人愛積極認真拍拼，是真有正面意義的歌曲，所以，才會當流行
到即陣猶未退‧不過，逐家甘知影“拍拼”的源本意思？
佇日本殖民統治台灣時，看到台灣百姓的衛生習慣無好，小的來講是對個人
健康無好，大的來講是對是對社會和歸台灣地區的發展不利，所以，管理當
局就全力推行“拍佮拼”的運動‧伊的實際內容是安怎樣？
一般家家戶戶的茨內外抑是攏拼掃甲真清氣，歸條街仔和庄頭就綴著清氣，
就會當避免病症的燒湠，人人健康，生產力才會增加，社會有活力，地區才
會繼續發展有希望‧所以，家家戶戶每工愛拼掃互清清氣氣，茨外3尺和茨
內灶跤、房間等等，攏是受檢查的所在；另外，定期辦大拼掃比賽，上清氣
的佇門口戶主牌仔邊貼大紅紙條，印“上清氣”；一般合格通過貼粉紅紙條
，印“清氣”；無合格貼白色紙條，印“無清氣”‧這是關係著面子的代誌
，逐家攏嘛毋敢凊採‧這就是“拼”的原本意思‧
“拍”猶是安怎講？就是茨內、房間仔底的棉被、枕頭、椅仔套、Tatami
等等，好天時，愛定期提出去外頭庭仔抑是茨前後壁，拍拍著，曝日頭，有
殺病菌佮除蟲仔的作用，算是日光高溫消毒法，安呢來維護逐家人的健康‧
因為管理當局嚴格執行，逐家嘛攏認真配合，所以，迄當時的公共衛生真好
，綴到日本本土的水準，比起迄當時的中國，進步佮清氣有夠濟‧佇日常生
活中，逐家見面拄到的招呼語，除了“食飽未？”、 “﹝要卜﹞去叨位？”
上濟以外，就是“有拍拼未？”
所以，“拍拼”是一種真好的習慣，即馬將伊解說做認真積極做代誌的行為
，意思是共款的啦！以前是講“愛拍拼”，才有清氣的環境和勇健的身體；
現代喝講“愛拼才會贏”，才有好前途‧是毋是共款的？
全站熱搜
留言列表
