jimmycmlin的部落格

台語詞句的本意(5)~~~~~食飽未佮欲去叨位~~~~~遊子
人佮人相見面攏會拍招呼，華語講：你好！英語講：Hi!Hello!How are you?日
語講：konnichiwa.ogenkideska.佇台語上接用到的大概是：食飽未？佮欲
去叨位？雖然，即馬的少年人，對這2句因為無了解來產生誤解，尤其老爸、
老母佇見面抑是電話中問講食飽未？﹝人因﹞就感覺呔問即款無意義的話？這真
正是無了解啦！
咱知影古早佇台灣是無好賺食，拼真久才有法度治腹肚爾爾，有一頓無一頓的嘛
袂少，﹝勿愛﹞講全白米飯，大部份的家庭攏是蕃薯簽參白米飯，有的干
哪食蕃薯箍爾爾，不過，比起食飽即頓猶毋知後頓佇叨位的人，已經算真好命啦
！所以，每頓有通食佮食的飽，就算是大代誌啊！才會演變出互相關心的招呼語
：食飽未？抑準是無通食，問的人會想辦法請伊食，是互相關懷幫助，鬥跤手渡
難關的表現‧雖然，現在的時空環境，無通食的情形真少囉！但是，這句好意關
心的招呼語一直留傳落來‧
欲去叨位？又是什麼意思？古早的台灣交通不便，搁卡免講用手機仔連洛
；漢人和已經漢化卡深的熟番蹛做伙，不過，卡偏僻的所在抑是山區，猶原是生
番出入的所在，不時有意外事件發生；濟人蹛的所在，有叫做xx寮，xx庄頭，x
x街，搁卡大的才叫做府、城‧由這去hia，攏不里阿遠，為著防止意外不幸事件
發生時，挱無摠頭尋無人，所以，佇路的相拄到的熟似人，就會互相問講：欲
去叨位？安呢咱就了解，這句嘛是互相關懷而且有實在意義的招呼語，才會當保
持留傳落來‧
所以，苦勸即馬的少年囡仔，毋通後擺阿爸、阿母好心問恁：食飽未？就嫌囉嗦‧
恁出門時，關心問恁：欲去叨位？什麼時陣會轉來？和誰做伙？就嫌厚話管
傷濟！愛知影這是真正為恁好，關心恁的心內話喔！