jimmycmlin的部落格

台 語文~~~~~無鐵窗的國度~~~~~遊子
20外冬前第一擺去日本觀光tit-tor，後來和出差算算嘛正10擺，鬧熱的本州，
卡庄跤的九州、四國和北海道嘛攏有去過，上頭一擺踏入日本的土地，一直到
即馬，互我上欣羨佮意外的是：日本人的茨，毋管是透天茨，公寓抑是大樓，
攏完全無看到鐵窗和鐵門‧頂禮拜搁一擺踏入日本的土地，猶原共款，表示
﹝人因﹞的民風保持真樸素，社會治安保持真好，並無因為科技發達，生活富
裕就將好的傳統放sak掉‧聽老一輩的講著咱台灣，互日本管的時，嘛是無鐵窗
啊！迄當時生活卡艱苦，不過精神上真闊活，因為治安好，無什好驚惶‧即馬，
毋知什時陣咱才會當搁佇無鐵窗的環境生活過日子？
每一個國家地區，攏有優點和缺點，雖然講人比人會氣死人，但是，比上不足比
下有餘；所以，咱猶是愛比較別人卡好的所在，咱才有法度繼續求進步‧以日本
來講，除了前阿講的無鐵窗的環境以外，另外幾點嘛會當提出來互逐家參考‧
(1).注重環保：
漸漸增加利用太陽能發電，用佇一般民家茨、公共會場所，路邊的路燈和寒天落
雪時，歸片白茫茫的路邊安全指標；工廠廢水的處理，廠內有2窟水池，1窟是
清水池，1窟是廢水處理了上尾排出的水，2窟攏飼魚仔，每工比較水池內魚仔
的活動度；另外，處理了廢水，就集中轉做沖便所用和沃外頭的草仔埔、樹仔叢
等等；工廠廢氣的處理嘛真正好，煙筒排出的攏是薄薄仔的白煙，每工走zong
人的頷仔領，1-2工嘛免驚會變烏，鼻空嘛是共款bhue烏mi ma，頭毛嘛bhue
粘粘的感覺；即擺搁看到環保的齒tok，是用5穀粉做成的，用完一段時間就會
分解散無去；大型百貨公司抑是商店，攏是用紙袋仔，細間的店和便利商店用的
塑膠袋仔，嘛是用完一段時間就會分解散無去的材質‧毋管市區內抑是郊區外，
風景區抑是鬧熱的商業區，日時攏無看到胡亂倒的糞埽，街仔路看到真清氣‧
(2). 注重交通安全：
大部份的駕駛人攏真守規矩，超速的情形真正少，毋管是大貨車、大客車抑是小
型車，無論佇高速公路抑是一般道路，攏無看到胡亂超車，嘛真少聽到喇叭聲；
跤踏車的前輪邊仔，攏有1 pa細粒燈火，利用磨擦生電來點電火球仔，保障暗時
騎跤踏車人的安全，這佇我的頭殼內，是台灣1960年代以前的代誌囉！後來就無
搁看到啦！但是，即pa細細的光明燈，確實會當保護騎跤踏車人的安全，所以，
日本人將伊保存落來，逐家嘛無嫌麻煩，跤踏車攏一定有迄pa細粒燈火‧逐種汽
車，嘛攏bhue歕烏煙佮臭油煙味‧火車、地下鐵的車班攏真準時‧街頭附近的說
明圖真清楚，互cue無路的人真方便‧市區道路的綠化嘛做甲真好，郊區毋是綠化
爾爾，更加是美化，逐種色彩的花蕊，互人看到心情真歡喜‧所以，毋管是行路
、踅街抑是坐車攏是真爽快的代誌‧