台語文~~~~~台灣閩南語~~~~~遊子
頂禮拜參加台語研習會，下晝的課是由李勤岸教授講演，李教授對語言學真正有研究，
尤其對咱的台語真用心，在美國哈佛大學擔任台語教授，專門在教外國人和第2代的台
僑學台語，伊的教材攏用白話字，抑就是傳統的教會羅馬字母系統(俗稱教羅)；李教
授講：在2005年6月教羅已經佮台灣語言拼音系統(TLPA)整合做台灣羅馬字母拼音系
統(簡稱台羅)；原本教羅佮(TLPA)的差別就無濟，即馬，台羅佮教羅的差別復卡少，
主要是介音由原本卡倚音值改變做卡倚音素；塞音改變用國際音標(IPA)的ts和tsh；
按呢台羅就算是一套真系統(systematic)，真有一致性(consistent)的音素文字，
會使做音標，嘛會使做文字，在教學上是好教、好學復正確‧
講演中，李教授嘛講到：即陣在台灣所講的閩南語，和原本在中國東南爿所講的閩南
語，已經有真大無相共啦！因為400年來，咱在台灣所講的閩南語，已經融入著平埔族
語、葡萄牙語、西班牙語、荷蘭語、日本語、英語等等外來語，差不多近20%，咱即陣
在台灣所講的閩南語，中國東南爿的人嘛無一定聽有，所以，教育部決定將咱即陣在台
灣所講的閩南語定為：台灣閩南語‧這親像英語的發源地是英格蘭，後來在美國的美國
人嘛講英語，語言專家就將美國人講的英語叫做：美國式英語(American English)‧
所以，台灣閩南語嘛是共款的意思啦！
頭一次聽到台灣閩南語的名詞，對照著美國式英語來講，實在有道理喔！自即馬起，咱
逐家就講：咱講的是台灣閩南語啦！有區別性嘛有獨立性，因為台語是指在台灣即塊土
地所講的話，包括：客語、原住民語、北京語(華語)和台灣閩南語‧又和在中國東南爿
(閩南) 所講的閩南語無完全共款，實在真拄當啦！
台灣閩南語的用字，80%是由漢字辭典揣有的，另外，融入著平埔族語和外來語的近20%
，可能需要以白話字參著用，以漢羅併列的方式，是未來的方向，這就親像即馬的日文
，是漢字和假名(平假名Hirakana和片假名Katakana)字母併列的方式共款，尤其是外
來語部份一定規定用片假名表示，予人一看就真清楚知影he是外來語‧以後咱寫台灣閩
南語文字時，看到白話字時，嘛隨知影he是原本漢字無的語彙，嘛減少予人變成倉頡的
機會，唸讀台灣閩南語文嘛變成真自然、輕鬆，毋免復臆來臆去，毋知按怎讀音才是正
確的困擾‧
教育部已經正式公告啦！嘛有熱心的出版社湊贊助，在逐所在漸漸開辦台羅研習會，由
學校的台灣閩南語老師(支援老師)、一般科老師、有趣味的社會人士等等來報名參加，
其實無困難啦！只要逐家有心，相信真緊由受訓完的老師來推展，予咱國內的大人、囡
仔，社會人士和學生囡仔，攏真緊來學會曉台羅系統，予咱台灣文化會當繼續傳落去！
全站熱搜
留言列表
