台語文~~~~~過年的傳統習俗~~~~~遊子
習俗、民俗亦是風俗攏是逐家的生活公約，人講：約定成俗，入境隨俗‧
其實是無強制性的約束，不過，無綴著做，變成和社會行為無共款，有時
陣會予人認為怪怪；論真來講，習俗是會綴著時代、環境、經濟、文化、
政治等等的社會變遷來調整改變，人講：新例無設，舊例無滅‧所以，所
有的新例嘛是人設出來的‧
咱來看過年的傳統習俗，40年來到今有若濟無共款：
(1).以前做甜粿、發粿、菜頭粿等，攏是隨家家自炊做，炊做的量真濟，
囡仔攏圍在灶邊等炊好隨通食，有人由過年食到清明節；即馬，攏嘛買便
的，而且買的量真少，有通拜拜就好‧
(2).貼春聯是猶有，不過，嘛減少真濟，春聯的用詞嘛改變囉！由反攻大
陸、殺朱拔毛、反共抗俄到莊敬自強、處變不驚到自由民主、政黨輪替，
到今180度顛倒反的聯共制台、穿紅衫反改革等等；相信大多數的台灣人
目睭金金看，心內感受真正深啦！
(3).守歲是猶有，博儌嘛是照常，進入網路科技時代，花樣復卡濟，平時
已經耍甲透天光，過年暝復卡免講‧
(4).壓年錢嘛是猶有，是囡仔上歡喜的期待，莫怪人講：囡仔上歡喜過年
，大人是煩惱過年‧
(5).開正、做客、圍爐等等，大部份是猶有保留，不過，方式改真濟，會
省就省啦！有出國過年的，有去餐廳飯店圍爐、請查某囝和囝婿的，買便
的料理年菜送到茨等等‧省工省麻煩‧
(6).行春拜年：早就改為電話拜年、電子批拜年、手機簡訊拜年等等‧
(7).等路和伴手：嘛是猶有，尤其受到商業化影響，任何節日攏炒作甲鬧
熱滾滾，予消費者心癢癢，無買才袂使‧不過，禮品內容隨著環保和健康
概念，嘛是一直在改變‧
(8).祭拜習俗和搶頭香：在宗教信仰卡深信的信徒才會趣寺廟參加搶頭香
，會記得為著搶頭香來跋倒斷手骨的意外；少年人和查某人是去百貨公司
搶買福袋仔啦！毋哪百貨公司，即馬連店腦賣場、汽車用品公司嘛攏推出
福袋仔喔！祭拜的牲禮、水果、糖仔餅等等，因為小家庭卡濟，拜後食袂
完，嘛是漸漸改變啦！這是合情合理的改善，任何信仰祭拜是誠心上要緊
‧放炮仔的情況嘛是改變減少，市面嘛發展出環保電子炮，有炮仔聲無污
染‧燒金嘛共款喔！
由打獵生活到農業社會，復進入工業社會、網路科技時代，習俗、民俗亦
是風俗自然綴著調整改變，這無講對毋對啦！嘛是約定成俗，久就慣勢接
受‧
留言列表
