jimmycmlin的部落格

.台語文~~~~~懷古之思~~~~~遊子
會記得細漢的時，街仔路的樓仔茨真少，看到三樓茨就不得了，人和人相照面攏一定
會相招呼問好，互人感覺真有人情味‧
日頭落山，暗時逐家點電火，不過，攏是黃色佮細粒的電火球仔，逐個嘛攏真滿意啦！
佇電火跤大人開港、做事抑是囝仔人寫功課，逐個嘛攏真認份‧
水道水真少，街仔底的人才有才調裝，大多數的人猶原吃古井水，愛用水桶仔綁索仔
落去上水，這是大人艱苦的工課，但是，囝仔認為真好戲‧到尾阿有用手壓的“捧普“
(pump)，加真省力，續落才進步到用電抽水，緊搁省力‧
﹝辶乞﹞當時茨內有電話和收音機就真讚喔！電話掛佇壁頂，講話機和耳機是分開的，
講電話時親像佇對壁講話，有尋茨邊隔壁的電話，就愛去叫人來聽講話，所以，茨內有
電話的就變成茨邊隔壁的通信中心‧聽收音機嘛算真好的享受囉！聽流行歌、唱歌仔戲
、講古等等，﹝辶乞﹞當時猶未有“摳應“(call in)，定定嘛是茨邊隔壁的人坐倚來做伙
聽喔！逐家感情就是安呢愈來愈厚‧電視、電腦、手機仔根本猶無看到影‧
冰箱是愛囥大塊冰角佇上頂層，才有保冷的效果，下面的空間才囥食的物件‧佇熱天時
的節日，無夠用的時，就利用大浴盆放水又搁囥細塊冰角，冰汽水、麥仔酒、大粒西瓜
等等，嘛是真好用，逐家嘛攏過著真歡喜‧
日時，大人認真拍拼做事，士農工商攏共款；囝仔真濟是褪赤腳去學校讀冊，有布鞋通
穿的就算是好額人啦‧日頭落山了的暗時，坐佇茨前圍著開講講古，囝仔就認真寫功課
抑是湊做家事；有時陣就去空闊的所在戲‧街仔路的車嘛無濟，卡濟的是腳踏車，所以
佇街仔路戲嘛無什要緊‧囝仔﹝要卜﹞戲的玩具物全部是家己做，即馬講的DIY，這是
省錢有環保概念佮會當動腦筋，是真好的代誌‧親像：剉竹子做炮仔管、水槍、錢筒仔
、鉛筆筒等，剖做幼幼的竹片仔，就和林頭葉共款，會當拗做逐種動物型抑是任何玩物
，想到什就做什，是真有創意的手藝活動；嘛有用稻草編草刀，用芒草編掃帚，戲砂石
仔土，柴棍仔等等，攏嘛是大自然的材料，提到就用，環保佮好用方便‧
即馬佇烏來的台車就是古早的輕便車，會記得由北門口到水汴頭﹝現在的北新街口到文
昌國中﹞，每次回水汴頭鄉下，就會坐一段輕便車，輕便車用人﹝扌速﹞，頂面坐人兼
載貨，方便佮緊，不過，因為是單軌，如果佇半路双方攏有車，有一爿的車愛徙落去邊
仔，讓另外一爿的車先過，有可能是載卡濟人抑是卡重的貨物抑是連續有兩台以上的車
等情況，逐家攏照規矩行，無爭吵無怨言‧
家家戶戶每工透早攏有人出來掃隨人的門跤口、茨前茨後，雖然是自掃門前爾爾，不過
全街仔路看起來就真清氣啦！每年嘛有定期大拼掃、清水溝，鄰長會出來每戶檢查，上
清氣的貼一張大紅紙條印“最清潔“，一般的是粉紅色紙條印“清潔“，懶屍的家戶互
貼白紙條印“不清潔“‧為了面子和衛生佮健康，逐家攏認真維持環境衛生，感覺比即
馬搁卡好！是值得驕傲的好風俗習慣‧
逐項物件攏惜著用，﹝勿會﹞胡亂﹝扌蛋﹞掉，攏有盡量回收再利用的環保概念和實在
施行的習慣‧做著比現在搁卡好‧衫褲破就補了搁再穿，物件歹就修理好搁再用；正經
無法度用才﹝扌穴﹞掉抑是賣互收歹銅舊錫的‧
古早的建築物，不管是政府機關亦是民家茨，攏真注重通風、採光佮逃生的設計，材料
的選擇嘛攏有符合節約能源的原則‧外表看起來真有藝術感，展現時代的特色，有的保
留到即陣，攏互人讚佩不已，非常珍貴難得‧
阿爸﹝辶乞﹞代會當讀到小學畢業就真難得啊！到阮就漸漸初中、高中、專科和大學，
阿爸定定對阮講：恁有法度讀就互恁盡量讀，不管是初中、高中、專科和大學攏支持恁
甲夠；不過，毋讀冊就愛去做師仔學手藝，因為360行，行行出狀元，只要功夫學有透
，又搁認真拍拼，飼腹肚無問題，有一工嘛會當出頭天‧阿爸講的實在無毋對‧到現代
研究所畢業的滿滿是，抑準學無透，無一技之長，就愛踅街仔路算電火柱仔‧
對照著現時科技這呢進步發達，交通方便，物資豐富，生活上真便利；但是，人口增資
，住的密度增加，人佮人之間的人情味愈來愈薄去，對大自然的資源過度開發利用，對
物件無愛惜使用，變成浪費，造成各種天災，其實愛講人禍才對，親像：水災、土石流
、全球氣候的不正常變化等等；人的日常生活緊張，逐種文明病症漸漸增加出現，人和
人之間的信任減少，道義失去，歹人歹事愈來愈濟，愈來愈驚人‧
唉！科技文明的進步，有時想起來，實在講無一定卡好啊~~~！