台語文~~~~~做伙18年的好伴~~~~~遊子
阮兜的物件攏真耐用搁耐操，前2工，和阮做伙18年的好伴~~~Yamaha50兜風，
才離開阮兜，自1987.11-2005.11.拄拄仔好滿18年，最近，因為漏油愈來愈厲
害，烏油和汽油攏有；機車行的頭家講：即款車的部品無好cue，拆開engine修
理工錢貴，實在是算﹝勿會﹞合啦！經過1-2個月的三思仔兩意，為著安全，亦
是決心互伊和阮離開啦！實在是真毋甘耶！
18年前，牽手講囡仔愛補習，愛學東學西，抑是有1台仔機車，會加真方便‧伊本
來干哪敢騎跤踏車爾爾，為了囡仔愛補習，伊決定bhue去考機車駕駛執照，不過
，看到路的車赫呢阿濟，驚危險，就講考輕型機車駕駛執照就好啦！有影查某人做
阿母以後，會變成搁卡堅強啊！
牽手考過輕型機車駕駛執照了後，隨買到即台紅白双色的YAMAHA50CC~~兜風‧牽
手嘛歡喜升級做有車階段的人囉！茨內大細漢攏真歡喜，囡仔搁卡歡喜，因為”兜
風”是in的專車，是阿母的愛心專車喔！只不過，每擺學騎的前1-2工，攏會看到
別人車禍受傷，互伊心內真驚惶無信心，雖然，有去空闊所在學騎幾擺仔，上續尾
伊抑是講：我看共款騎跤踏車就好啦！卡安全‧代誌無法度勉強，自按呢起，頭尾
20冬，接送囡仔的工課，我就無法度閃避囉！每擺佇門口等囡仔下課時，大部份攏
是阿母佇等，只有真少數的是阿爸專車，不過，阮兜即台阿爸的專車”兜風”， 囡
仔攏坐甲真歡喜，迄當陣猶免戴安全帽仔，有幾仔擺3個囡仔同齊載，雖然是稍可仔
危險，不過，慢慢仔騎是無要緊，大人囡仔攏感覺真趣味‧
3個囡仔頭尾差7歲，自未讀幼稚園開始就學鋼琴，學鋼琴時離茨卡近，互牽手陪in去
，其他自進入小學、國中、高中、大學等等，毋管好天抑是落雨，無論透早抑是暗矇
矇，專車”兜風”，攏嘛準時出動‧逐種無共的補習班，同學的活動等等，無共階段
的成長，阿爸的專車”兜風”攏嘛一路陪in行過，陪著3個囡仔的喜、怒、哀、樂，
運動會啦、生日聚會啦、聯考放榜看榜單；留佇班上做功課、聽音樂會、參加合唱團
、練舞、考試成績無好流目屎、佇校內受委屈等等，有人講：囡仔的成長過程是無法
度NG的，抑準父母顧賺錢、顧事業，有1工斡頭看，會反悔一世人喔！所以，搁按怎
樣無閒，我嘛攏一定撥工，盡到做一個負責任、有愛心的專車司機，雖然有苦嘛有甜
，看到囡仔一步一步向前行，毋是看學業成績的好bhai，是看in愈來愈bhat代誌，愈
來愈有智慧，看到的世界愈來愈闊，心內就真快活‧囡仔的成長過程有影是無法度NG的
，好佳載，有專車”兜風”一路相陪，我嘛免後悔啦！
到即馬嘛做伙18年囉！機器真濟嘛磨ui去囉，又搁cue無部品通換新修理，想講嘛是差
不多愛互伊退場歇睏的時陣啦！雖然毋甘，總﹝勿會﹞用哩等到發生不幸意外才互伊歇
睏，總講一句：非常感謝伊佇18年來，無怨無歎，陪著阮兜3個寶貝囡仔，一路順序成
長！互阮做阿爸佮阿母的真安心、快樂、歡喜‧
留言列表
