台語文演講稿~~~~~阮兜~~~~~蔡素珠﹝小學生組﹞ ( 遊子整理)
阮兜蹛佇庄跤，茨內的人攏真拍拼，日頭那出就來做，日頭那落就來歇‧阿公今年
80外，身體真勇健，種田拍鼓有名聲，有時搁會替人講親晟‧阿媽洗衫佮煮飯，早
暗3叢香，拜託神明來保庇，保庇阿公食百二，保庇囝孫仔駛車平安佮順序，順續
保庇阮阿爸賺大錢‧
阿爸阿母佇市內做生理，近來生理有卡﹝禾黑﹞，為著生活嘛是愛忍耐，最近搁互
人倒會仔，差一點仔倒頭栽‧阿爸講：“好佳在！好天有積雨來糧，抑是無，即聲
穩當害啦！“伊搁講：“舉頭3尺有神明，做人奸巧無路用，善惡到尾有報應，遠
在千里近在眼前‧牛是快牽人惡料，無福賺錢居為稠，後擺綴會仔愛細膩，你貪伊
的利息，伊吞你的母錢‧“
我佮阿兄攏愛鬥做茨內的工課，親像：洗碗盤、披衫、掃塗跤等等，阿母講：做牛
得拖做人得磨，少年未曉想，食老毋成樣‧伊叫阮愛學會曉獨立，後擺拄到困難的
時，才有法度去面對和處理‧阮嘛知影愛聽父母的教示，紅紅幼幼伊晟起，後擺事
業若建置，第一頭先愛有孝伊‧
“小烏”是阮兜﹝扌去﹞轉來的流浪狗，伊會替阮顧門口，抑是有生份人行到阮兜
，伊就大聲：汪！汪！汪！抑是賊仔就驚甲緊落跑，逐家攏﹝口可﹞咾“小烏”真
厲害‧有一條歌“有幾間茨，用磚仔毃，看起來普通普通~~~‧這干哪是佇講阮兜啦
！日頭落山，天將﹝要卜﹞暗的時，囡仔佇栗仔埕走相﹝辶足﹞，大人提椅頭仔坐鬥
陣，開講說天地，茨邊頭尾大細項代誌攏報互大家知，阿水嬸仔娶新婦，逐家愛去鬥
挲圓仔，阿狗叔仔生日，愛會記得買豬跤麵線；俗語講：千金買茨，萬金買茨邊‧
我深深感受到茨邊隔壁珍貴的感情‧
月娘光光掛天頂，細漢的時，阿母講：嫦娥就是蹛佇企位‧這幾年來，我斟酌看，
我感覺月娘有目睭、鼻仔，佮有笑瞇瞇的喙，足親像阮阿母的面，赫呢阿甜，赫呢
阿媠！有時陣嘛會當聽到水雞咯咯叫的聲，圳溝的流水聲，嘛有肚猴佇念歌詩‧鬥
做伙親像一場音樂會‧阿母講：暗時轉來庄跤，享受到清涼的空氣，風一陣一陣吹
來，涼啊涼！歸工的疲勞攏散了了去啦！真正好！
不過，自工廠來了後，阮定定會鼻到一陣一陣的臭味，圳溝的流水嘛變甲烏烏烏，
大細尾魚仔嘛無了了‧雖然愛拼經濟，但是犧牲到自然的環境就毋值啦！希望政府
佮企業家的頭家，全民攏愛注重這問題才好‧嚮望逐家愛疼惜台灣的塗地，互咱美
麗的好山好水，美麗的Formosa，留互咱囝孫，一直到永遠永遠‧
全站熱搜
留言列表
