台語文~~~~~日頭赤炎炎，隨人顧性命~~~~~遊子
俗語講一樣米飼百樣人，又搁講人心隔腹肚皮‧所以，每一個人心內佇想什麼？實在親像
烏矸仔貯豆油--無底看，看﹝勿會﹞到‧不過，俗語嘛有講：人不為己，天誅地滅‧人若
無私心會互雷斟‧有影啊！生活中逐家攏嘛是隨人的隨人好，別人的生蝨母‧有代誌發生
的時，攏嘛隨人顧隨人的，才有講別人的囝死﹝勿會﹞了‧這就是像今仔日所講的題目：
日頭赤炎炎，隨人顧性命‧
拄拄聽到這個題目的時，會互人感覺私心是無好耶，其實，有私心嘛有好的作用喔！即馬
有真濟人去做志工，這是非常好的代誌，不過，家己的茨內代誌抑準無先顧互好，親像囝
仔放學轉來，茨內有人佇喔？毋通互囝仔做一個鎖匙囝仔；茨內的老大人是不是有人照顧
？茨內的家事是不是攏整理甲好勢？毋好豬頭毋顧顧鴨母卵、抑是鋤頭毋顧顧畚箕‧抑準
有這情形，私心就真要緊，咱要先有私心，甲身軀邊的代誌先顧互好，﹝勿會﹞出意外的
事件，增加社會的負擔，抑有時間精神才投入志工的工作，安呢才有意義‧俗語有講：先
顧腹肚，才拜佛祖‧甘不是？
但是私心尚重就毋好，佇社會上人佮人做夥，一定有相交插；親像即馬真濟少年的，定定
講：只要我歡喜，有什不可以‧政治人物嘛是共款，抑準逐家攏安呢想、安呢做，咱的社
會、國家就天下大亂囉！咱逐家攏知影，咱台灣已經是一個自由、民主、法治的國家，抑
準像頭前講的，就只有自由、民主無法治，社會、國家就無制度啦！個人嘛好，政黨嘛好
‧攏顧隨人的利益，安呢，社會團體、國家一定散了了去啦！所以，個人嘛好，政黨嘛好
，咱攏﹝勿會﹞應有尚大的私心，要尊重咱的法治制度，才會當保障咱逐家的自由佮民主
‧保持到永遠，互咱後代囝孫攏有法度繼續享受到‧
尚續尾，我感覺俗語、諺語是咱祖先留落來的智慧，咱要瞭解伊的真正意思，正面的、好
的咱要照著做，負面的、歹的咱知了後，就毋通去做；這才是正確的認知佮瞭解‧親像今
仔日的：日頭赤炎炎，隨人顧性命‧咱就照正面的意思去做就對啦！
留言列表
