用藥保健~~~~~善用藥品資訊~~~~~遊子 頂禮拜5下晝2.00-4.00去平鎮市民大學講課，教室坐甲滿員，下晡時拄好食飽無若久
佮天氣熱熱，但是，攏無人拄龜，問問題的真濟，逐家真正真認真，互我愈講精神愈好
，時間到啦，猶講未煞‧今仔日講的單元內容是：善用藥品資訊‧
咱愛會曉分別什麼是真藥？什麼是假藥？什麼是食品？咱愛由叨位cue到藥品相關的資
料？才﹝勿會﹞去買毋對藥，食毋對藥‧咱國內的電影有分級，咱的藥品嘛是有分級喔！
(1).處方藥‧屬限制級的，一定愛互醫師看病完，開處方互患者，才有法度買到藥品‧
(2).指示藥‧是有治療藥效，不過，安全性比處方藥卡懸，毋免醫師開處方就會當買到
，但是愛互醫師抑是藥師指導下來服用‧處方藥佮指示藥，攏一定有衛生署的許可字號
，佇國內製造的是：衛署藥製字第xxxxx號；進口的是：衛署藥輸字第xxxxx號‧
(3).成藥‧是安全性上懸，衛生署的許可字號是：衛署成製字第xxxxx號‧又分做甲種
成藥：像胃散，消毒藥水，酸疼布等等，愛有藥商執照的店才會當賣‧乙種成藥：像白
花油、綠油精等清涼提神劑，佇任何店仔攏會當賣‧
佇藥品的包裝盒仔，攏一定愛標示出：許可字號、藥品分級、藥品中文和英文名、藥量
成分、藥劑外型、藥品的用量用法、副作用、製造日期、保存方法和日期、製造公司名
和住址、販賣公司名和住址等等‧萬一有問題，才cue有原頭資料‧
bhue cue說明藥品的資料，除了前仔講的包裝、藥品的說明書以外，市面上嘛有常用藥
品的參考冊，上網路查資料嘛真方便，其實上方便的是恁兜附近的藥師藥局，只要恁拄到
任何用藥的問題，就去問抑是請教恁兜附近的藥師藥局，一定攏會當得到真滿意的答覆‧
希望逐家會曉好好仔來利用‧
另外，去病院、診所看病後，由藥局領藥仔的藥袋仔，頂面的資料嘛是非常要緊喔！愛一
項一項對看，才﹝勿會﹞提毋對藥仔，用毋對藥仔‧看清楚你的名、看病的科別、藥品的
種類有幾項？每項的數量是若濟？用法用量無清楚，愛當場問互清楚，食藥仔的時候、保
存的方式等等；抑是轉到茨才發現無清楚，就隨拍電話去病院、診所的藥局問互清楚，抑
無就去恁兜附近的藥師藥局，問藥師嘛無要緊‧俗語講：敢開喙是失一時，毋開喙是失一
世‧食毋對藥仔，造成遺憾的代誌就慘啦！
猶有病院內印的衛教單和逐間報紙的醫藥保健版，攏是真好的用藥保健參考的資料，抑是
有合用的部份，就將伊剪落來，保存起來，就是真好的資料啊！網路頂賣的藥品，毋通去
買，he是違法的，問題真正濟；電視台和廣播電台的廣告藥仔，大部份嘛攏膨風烏白講，
講什麼治百病，保証無副作用‧食了就知害，了錢佮拍歹身體，政府嘛一直佇掠，掠到就
罰款，嚴重的送法院，嘛有吊銷藥品執照，﹝勿會﹞當販賣繼續害人‧
為了家己和茨內人的健康，用藥愛真細膩，真小心‧請會記得：恁兜附近的藥師藥局，就
是上好去請教的所在喔！
全站熱搜
留言列表
