台語文演講稿~~~~~路是家己行出來的~~~~~蔡桂珠~(遊子整理)
會記得有1位老師對我講：“路是家己行出來的喔！“即句話對我的影響足大的‧毋知
逐家有想過無？“路是家己行出來的‧“即句話對咱的影響有若大？真濟人拄到困難，
上頭先的反應就是想辦法閃避，“啊！這我無法度啦！叫伊去啦！”“啊！我無閒啦！
你去cue別人啦！”抑是對家己無信心，歸工佇怨天怨地，怨人無老爸！
為著生活日也操，暝嘛操，壓力親像1塊大石頭，無形中甲家己心肝壓diau diau，有目
屎嘛攏吞落去腹肚內，苦悶難消，鬱卒袂了！生活艱苦，過著真硬斗‧人生無順序如意
的代誌真濟，但是，定定聽人佇講：危機就是轉機！路是家己行出來的！
咱愛甲困難準做磨練，心情放乎開，想辦法甲危機變做轉機‧若無，就會“煩惱袂死嘛
帶傷‧海海仔人生，海海仔過‧歹歹仔時機，穩穩仔做；艱苦是一時的，咱就愛堅心出
頭天，路是家己行出來的！行路若有風，活著才會有媠氣！時啊！運啊！命啊！攏愛看
乎開！
佇這我bhue佮逐家分享1個故事：
佇春秋時代，有1個叫做秦穆公的人，伊有1隻真ghau走的千里馬，攏甲hit隻馬飼佇馬
椆內，秦穆公真愛即隻馬，伊定定騎伊的千里馬，去四界tit tor，四界拍獵‧真意外！
有1工半暝，有1陣腹肚枵甲大腸告小腸的做穡人，因為in太久無好好仔食物件，in就趁
三更半暝的時陣，甲秦穆公上甲意的hit隻馬，偷牽去岐山山跤，將hit隻馬tai死，起火
煮馬肉來食‧
過無若久，管馬椆的人知影了後，就緊走去向秦穆公報告，“大人！大人！害啦！大人
的愛馬仔互人偷牽去啊！佇岐山山跤hia！“秦穆公聽完，就帶1甕酒佮1陣衛兵。趕去
岐山山跤；秦穆公這個人腹腸真闊，伊毋哪無責罰hit陣做穡人，而且搁甲in講：食馬肉
愛配酒，才會好消化，對身體嘛卡好。秦穆公話即講完，就留下hit甕美酒互in lim，才
cua衛兵倒轉去‧秦穆公做人真有量，俗語講：有量就有福‧伊嘛替家己留1條出路‧
後來，無若久，秦穆公佮晉國相戰，有1工佇岐山附近，伊互對方的人包圍著，真危險的
時陣，雄雄有1陣毋驚死的人衝出來，將晉國的兵仔衝乎散，救出秦穆公；即陣做穡人嘛
知影“食人1口還人1斗‧” 秦穆公詳細看即陣救伊的人，就是hit當陣，伊所原諒的偷食
馬的做穡人‧抑準秦穆公hit當時無原諒in，抑是處罰in，可能後來就無人通好來救伊啊！
我是1個教學支援工作人員，會記得，我第1年去學校教台語，學校無教材，愛我家己編
教材，而且，逐禮拜愛上司令台教全校台語，hit當時，感覺壓力真大，嘛真想bhue放棄
，好佳在，我想到老師甲我講過hit句話：“路是家己行出來的喔！“我才搁開始有信心，
四界收集相關的資料，來編做教材教學生囡仔，佮同事分享‧佇zia我bhue感謝所有鼓勵
我的老師，關心我的同事，支持我的學生‧嘛愛特別感謝我的學校，互我這個磨練學習的
機會，我認為我對會起學生、對會起家己、對會起學校‧這就是“做人若媠氣，行路就有
風‧”我嘛感覺已經行出我家己的路囉！
留言列表
