jimmycmlin的部落格

台語文~~~~~恁臆我幾歲囉~無限的思念~~~~~遊子
今年太平洋區第19號風颱，嘛是侵入台灣全島的第三個強烈風颱~~龍王，昨暝罩著全台灣島，
半暝風比雨卡大，搁聽到幾聲仔雷公dan，Maggie上驚聽到雷公dan，最近老化現象搁卡嚴重，
透早起床，無聽到伊平常的叫聲，心內感覺怪怪，落1樓看著，想講4跤排齊齊，睏甲真甜，
，以前伊攏會目睭撥開看著才搁睏，抑無就是大聲叫，bhue去外頭便所，今仔日完全無共款喔
！“Maggie!Maggie!”，叫伊攏無反應，啊~~~!害啦！Maggie隨著”龍王”往生去啦！
隨叫牽手落來，先拍電話互動物醫生邱醫師，透早將邱醫師吵起來，雖然歹勢嘛無法度啊！因為
邱醫師就是Maggie的專任醫師，外頭風猶原真強，送Maggie到邱醫師的診所，邱醫師檢查了就
講：10歲囉！心肺功能會衰竭退化，是自然老死往生，看伊睏甲真甜的款，大概是無艱苦才對‧
外表安詳，算是真好去啦！阮2個心內毋甘，嘛是麻煩邱醫師處理Maggie的後事，用火化卡適宜
‧阮輕聲叫著Maggie，叫伊好好仔綴邱醫師cua伊去極樂世界‧bye!bye!
心情非常沉重轉到茨，才連續拍電話互上疼Maggie的小主人~~desserty,fisher,faye‧逐家佇
電話中就攏已經頂句接﹝勿會﹞到下一句，這對阮zit家來講，是真不幸的消息，但是，生病老死
，是有性命的生物界攏愛行的路，每個攏拄會到，踮邊仔其他的人，嘛攏愛去面對，好來好去，
快快樂樂過1生，嘛算無冤枉過啦！
想到最近這幾個月，Maggie的習慣就有漸漸佇改變囉！卡會喘，看到愛伊的人轉來，就喘搁卡厲
害，是有用藥水互lim，看情形1工食2-3擺，是有稍可仔改善啦！放尿習慣所在改變，無定時定位
，拄開始想講胡亂放，稍拍著，愛教示才好，不過，1擺搁1擺，教﹝勿會﹞曉，翻冊一看，這嘛
是衰老現象之一，了解按呢，就無搁拍伊啦！情況愈來愈濟擺，顛倒可憐伊，感覺真毋甘啊！Beh
樓梯嘛感覺卡無力，體力有卡退步，喙齒早就一直落，真早就毋敢互伊食骨頭囉！看到伊老化的過
程，想到咱人嘛是共款，俗語講：在生1粒豆，卡贏桌頂拜豬頭‧在生就應該好好仔款待，愛對序
大人有孝，對身邊的人愛珍惜照顧，才﹝勿會﹞造成遺憾的代誌！雖然講：父母疼囝長流水，囝想
父母樹尾風‧實在講有孝愛佇在生時，抑無，往生以後的場面搁卡鬧熱，搁卡大，嘛是無意思啦！
對寵物的感受是按呢，對序大人有孝搁卡愛真心做到‧
Maggie10歲外啦！等於人類的70外歲，1997年熱天，hit當陣的寵物竺鼠~~月月，嘛是飼5-6年
自然老死，囡仔佇傷心時，隔壁賣萬巒豬跤的頭家，將Maggie掠來互阮，全家看到當然真歡喜，
拄來時猶是幼齒喔！不過，佇伊原本的主人兜有生過1胎，來阮兜以後，發生過子宮化膿症2擺，
所以開刀後就無生過啦！就一直過著單身貴族的生活，佇茨內無驚半人，除了我這老的‧這8年外
來，伊就是阮茨的的一個，買新衫，過年包紅包，特別日子準備好食物，攏有伊的份啦！餐廳、冊
店、一寡仔寵物﹝勿會﹞當入去的所在，阮攏偷掩用袋仔裝，互伊同齊入去，但是，大部份伊嘛攏
真認份，乖乖仔配合；伊帶互全家真濟的歡樂喜氣，嘛是全家的一個精神柱仔，毋管佇國內國外，講
電話時，一定想到伊，伊佇電話邊仔時，嘛一定叫2聲仔向你回應喔！
強烈風颱~~龍王猶未離開台灣，祈求Maggie就安心綴龍王到極樂世界，歡歡喜喜繼續過你後階段
的生活‧咱逐家來祝福Maggie，一路順序，好好仔行喔！
補註：Maggie的後事是由邱醫師轉去台北縣林口鄉頂福村69-2號的懷恩寵物安樂園內，先經過
祭拜後，才參與集體火化，才搁經過集體厚葬，進入寵物集體追思墓園，立有集體追思墓碑‧期盼
Maggie佇新所在有新朋友，好好仔過‧以上補註‧