台語文用藥保健~~~安眠藥到底會當食若久~~~遊子
失眠就是睏(勿會)去，是真濟現代人定定拄著的問題，照統計差不多有10~35%的人，bhat
有發生過失眠的情形；出現失眠的情形嘛定定和一般的病症、精神病症、工作效率、意外事
故的發生有關連‧按怎用有效的藥物療法，來幫助患者解除、改善失眠的問題，一直是醫生
和失眠患者所同齊關心的話題‧
不過，大多數佇探討安眠藥的藥效和臨床安全性實驗，時間攏無久，執行實驗研究的時間大
概無超過5禮拜，所以，佇目前並無任何一種的安眠藥，有予衛生署核准會當連續使用超過
幾仔禮拜‧以傳統使用的Benzodiazepine類安眠藥來講，照國內外所規定的標準，以4~6
禮拜為限‧卡新一代的Non-Benzodiazepine類安眠藥來講，可能會當連續使用到6個月，
共款維持原本的藥效，猶未產生耐性抑是嚴重的副作用‧不過，亦是需要卡濟的實驗研究資
料報告來確認，才有法度予醫生和失眠患者信任‧
因為失眠患者愈來愈濟，失眠症的連續性和復發性真正懸，佇門診患者的資料來看，食安眠
藥超過6禮拜以上的人，非常濟，超過6個月的人，嘛是(勿會)少喔！尤其是合併出現憂鬱症
的患者，食安眠藥的人是滿滿是啦！為著食安眠藥患者的安全，美國藥物食品管理局(FDA)
的專家，已經建議後擺即類安眠藥，欲提出新藥許可證申請時，一定愛附上6個月以上的實
驗研究資料報告‧
總是講：對慢性失眠患者，是無建議食安眠藥超過4禮拜以上，因為，實在是欠缺安全性
和藥效的研究資料；所以，抑準欲長期食安眠藥，上好愛合著下面的條件：
(1).失眠症佇用安眠藥後共款繼續睏(勿會)去‧
(2).用過真濟無共的藥仔後共款繼續睏(勿會)去‧
(3).安眠藥的安全性和藥效對使用的失眠患者，有做好適當的評估‧
(4).教育失眠患者知影佇目前實在是欠缺安眠藥長期使用的安全性和藥效的研究資料‧
(5).醫生有和失眠患者充分來參詳、討論，用藥物治療以外的方式來治療失眠情況‧
其實，醫生亦是相關藥師、護理人員，茨內的親人，愛定定提醒患者，保持定時運動的好習
慣，維持好的睏眠衛生好習慣，才是對付失眠症頭上根本、上有效的方法‧
全站熱搜
留言列表
