jimmycmlin的部落格

用藥保健~~~~~”母奶”是嬰仔上好的食物~~~~~遊子
世界衛生組織建議正常拄仔出世的嬰仔，在頭先幾個月，完全用母奶來哺飼是上好的哺育方式‧
醫學研究嘛證明講：母奶市上天然又符合嬰仔成長需要的食物，
會當增加嬰仔的免疫力；如果改用人工配方的奶粉來哺飼嬰仔，有可能會增加嬰仔腹瀉、漏屎、
呼吸道感染、中耳炎等病症，嘛會增加日後嬰仔得到過敏性病症、身體大箍過重和心臟血筋方面
病症的危險性‧
母奶的營養成份：
(1).卵白質上適合咱人的嬰仔，﹝勿會﹞過量，好吸收、好消化，卡﹝勿會﹞引起過敏的體質‧
(2).脂肪大部份是無飽和脂肪酸，尤其長鍵多鏈的無飽和脂肪酸(含有20/22個碳分子)，就是最
近市面上營養食品中上熱門的DHA，在神經組織內，親像：頭腦和視網膜中，攏有真濟的DHA喔！
(3).碳水化合物主要是奶糖，真容易來分解做葡萄糖，提供予身體逐所在代謝的需要，包括腦部
等等；嘛會使幫助鈣質的吸收，予嬰仔的腸子偏倚酸性，會當壓制歹細菌的滋生增加‧
(4).電解質的含量包括鐵質，雖然比牛奶卡低，不過，在嬰仔身體內的利用吸收顛倒卡好；予嬰
仔身體內的含量保持正常，嘛減少嬰仔腰子的負擔‧
(5).維生素的含量嘛真濟，目前拄仔出世的嬰仔攏有注射維生素K，免驚無夠；另外在台灣日頭
照真充足，嘛免驚欠缺維生素D；不過，食全齋、全素的阿母，在予嬰仔哺飼母奶時，需要注意
維生素B12欠缺的問題，要想辦法另外來補充，才有法度提供予嬰仔成長發育的需要‧
為著支持世界衛生組織的建議政策，即馬，全世界的媒體攏禁止播出人工配方奶粉的任何廣告，
辦公室、百貨公司等等的公共場所，攏有準備母奶哺飼室；逐國嘛攏成立母奶哺飼推廣組織和網
站，咱台灣嘛綴著世界的跤步行‧真濟大病院、鄉鎮市公所等，攏有成立母奶哺飼指導站，定期
聚會做伙，互相分享經驗和互相支持‧因為，”母奶”是嬰仔上好的食物啊！