jimmycmlin的部落格

台語文用藥保健~~~~~囡仔愛動毋是無教示~~~~~遊子
有寡父母會想講：按怎別人的囡仔上課時攏乖乖仔坐，阮的囡仔
就坐袂tiau，動來動去，食飯時嘛摸東摸西，按怎教，按怎罵嘛
無效‧讀冊憨慢，人際關係無好，實在予做父母的煩惱‧其實，
這和父母亦是老師的教示無關係啦！在醫學上即類強烈注意力缺
失的症頭叫做過動症(ADHD)；在世界衛生組織的統計，差不多有
5%~6%的囡仔會出現過動的症頭，這算是1種病症，用罵、用打攏
無法度解決問題，需要帶愛動的囡仔予醫生診斷，經過治療和適
當的引導學習，才會當改善愛動囡仔的症頭，予伊會當發展出伊
的學習能力，慢慢仔和其他正常的囡仔共款生活佮學習‧
過動症(ADHD)可能是和大腦額葉的控制能力降低有關係，大腦神
經信號的傳送是需要經過靠多巴安(Dopamine)，抑準多巴安的
代謝失調無正常時，就會引起控制能力降低，臨床上需要頂真的
檢查，才未造成誤診，親像：腦瘤、腦炎、五舞蹈症、豬母癲
(癲癇)、妥瑞氏症、聽覺障礙症、額葉症候群等等，愈有經驗的
醫生愈會當做出正確的診斷‧
過動症(ADHD)毋是囡仔才有的症頭，少年人和大人共款有可能得
到；過動症(ADHD)的診斷包括：日常生活中，注意力是毋是有集
中？是毋是有過動的情形？是毋是有稍可仔事誌就衝動？在咱身
軀邊的人，抑準嫌疑有過動症的款，上好要緊去病院予醫生看，
才袂造成家自本身、父母、親朋好友、同學、同事的困擾，嘛才
袂造成人際關係的意外衝突‧即馬的醫療機器進步真濟，親像有
：照腦波、超音波、誘發電位、電腦斷層攝影、正子攝影、核磁
共振儀等等，攏會使幫助醫生做出正確的診斷‧