jimmycmlin的部落格

用藥保健~~~~~幽閉症~~~~~遊子
幽閉恐懼症(Claustrophobia)，是對環境驚惶的1種症頭，臨床上算是恐懼症的1種；
患者對特定環境空間的情境，無事無誌，無張無持，心內自然會驚惶起來，尤其對密閉
的小空間特別敏感，親像：流籠(昇降電梯)、高壓氧治療儀器、卡窄的車箱、飛機艙、
船艙、樓梯間仔，亦是烏暗的地下室、無窗子的小茨間等等‧
患者出現的症頭，除了驚惶以外，亦有焦慮、心頭亂紛紛、出冷汗、心臟跳卡緊、喘氣
嘛轉緊、頭暈目暗、心內想欲吐、坐袂tiau、睏袂去等等‧前仔的症頭輪流無定時出現
，時間嘛可能拖真長，有半年以上，甚至幾仔年久長，影響到日常正常生活‧
幽閉恐懼症上倢出現在細漢囡仔時陣和青少年期，大部份來自無爽快的經驗，親像：做
毋對事誌，受到長輩的處罰，亦是受到別人的欺負等等，所以，對細漢囡仔的管教態度
和方式非常要緊，稍可仔無細膩、失注意，有可能影響到細漢囡仔的心理和生長過程，
一直到永遠喔！