jimmycmlin的部落格

新聞辭典~~~~~部落格Blog~~~~~遊子
電腦網路科技的發達，互人愈來愈方便，古早人講的：秀才免出門，會知天下事‧
即馬，嘛毋免秀才，每1個人攏嘛做會到‧揣資料、即時開講、復配合視訊設備，
每1個人攏嘛變成千里眼和順風耳，尤其愈來愈受人愛用的網路電話(Skype)，毋
免加算電話錢喔！但是，這1-2年來，佇全世界燒甲cing-cing滾的就是”部落格”
Blog啦！
什麼是”部落格”Blog？英文的Blog是由Web Logs的字演變過來，Log是記錄的
意思，像航海日誌叫做logbook，Web Logs復縮寫做Blog，網路頂的記事，算是
新字啦！華語將伊翻譯做”部落格”，抑是”網誌”，嘛攏有合意思喔！
”部落格”Blog是突破一般人佇建立網頁的技術障礙，互逐個人真緊就上手，真簡單
順序來操做，每1個人攏會當利用”部落格”Blog，貼上個人的相關資料，包括：
生活上的相片，隨時寫的心得作品記錄，和親朋好友互相聯絡，和親密的人講秘密的
話，特別的話題和無熟似的人討論分享等等，而且，會當隨時改變抑是提供新的個人
資料‧所以，受到全世界的人愛用，尤其是少年人真正歡迎，是目前除了MSN以外，上
流行的網路頂活動喔！漸漸連銀髮族的老大人嘛感覺趣味，愈接觸就愈愛戲‧
真濟藝人嘛利用伊個人的”部落格”Blog，貼出一寡卡無公開，連狗仔報嘛無攝到的，
不過，Fans真想欲知的li li kok kok的代誌，和伊的Fans來分享，爭取伊的人氣‧
這是一種免費抑是開真省的錢，就有真大的宣傳效果，予Fans增加愈來愈濟‧
一般人嘛是共款會當按呢來推銷家己佮順續認識真濟網路頂的朋友，正經是天涯若比鄰
啊！和別人的”部落格”Blog串聯，隨時去行踏，分享新資訊，攏嘛免驚綴無到時代，
隨時互頭殼充電，嘛會當互人﹝勿會﹞記得歲頭，什麼時陣攏感覺真少年‧抑是猶未入
來”部落格”Blog瀏覽的人，尤其已經退休的銀髮族朋友，歡迎先入來參觀瀏覽別人的
”部落格”，看你趣味什麼？天文、地理、經濟、理財、藝術、逐種語文、宗教信仰、
逐項運動、美食、時裝、旅遊、車輛、收藏品等等，大部份應該攏有，相信真緊你就會
參入來經營你個人有特色的”部落格”喔！