jimmycmlin的部落格

新聞辭典~~~~~芬蘭化/讓渡主權求偏安~~~~~遊子 2009.12.31.
媒體報導：美國有政論專家提出看法：認為台灣已經漸漸行入芬蘭化的地步，建議將台灣排除佇盟國的名單內-----。什麼是芬蘭化？
芬蘭化[Finlandization]的意思是講：佇2次大戰後的冷戰時代，由美國佮蘇聯為頭的兩大集團相對抗，位佇蘇聯邊仔的小國芬蘭，為著國家安全設想，表面上維持著議會民主制度佮自由經濟制度，因為對蘇聯驚惶，所以，調整外交、內政、國防軍事政策等等，完全配合蘇聯的意思來行事，予全世界的國家認為芬蘭差不多是蘇聯的細漢附庸國啦！
芬蘭佮蘇聯佇1948年簽芬蘭佮蘇聯友好合作互相條約，芬蘭答應袂佮反蘇聯的國家結盟，所以，無加入北大西洋公約組織，欲加入其他國際組織進前，一定先愛蘇聯的同意，才敢繼續推展後續的活動‧
佇內政方面，芬蘭政府一直禁止反蘇聯的消息報導，允准公權力查禁反蘇聯的出版品，種種做法予全世界的國家認為芬蘭是進行自我審查，完全無家己的國家主權，所以，由當時的西德創造出芬蘭化的名詞，意思是講親像這種讓渡主權求偏安無正常的行為‧
毋過，雖然芬蘭已經將姿勢放甲低低低，佇1971年蘇聯猶原以軍事武力行動進入芬蘭，達到全面控制的地步；最後亦是由北大西洋公約組織強力介入，才解除芬蘭滅國的危機‧
台灣佇最近1年半以來，執政團隊拼命倚中國，無顧台灣的主權，想欲提到暫時的和平，佮當時的芬蘭政府的做法真正親像，其實，蘇聯猶有尊重芬蘭的主權，將芬蘭看為1個國家，所以，發生蘇聯的侵占，世界組織會當出聲幫贊芬蘭，救回芬蘭的主權！咱看中國，自頭到尾只有”一中”爾爾，根本無認為台灣是1個國家，恐驚台灣上尾仔是由芬蘭化閣變成香港化，咱看回歸予中國統治的香港，現此時的香港情況，大家應該目睭撥予金，香港化是比芬蘭化閣較慘！閣較死啊！