jimmycmlin的部落格

新聞辭典~~~~~歐豬4國佮金磚4國~~~~~遊子 2010.02.08.
頂禮拜又閣傳出歐豬4國引起世界金融的風暴，是自前年美國雷曼兄弟公司倒店、冰島銀行喝倒的金融滾絞龍佮舊年中東杜拜跳票事件以後，閣1擺可能會影響到全世界金融的風暴‧ 什麼叫做歐豬4國？
歐豬4國是指歐元區的4個國家：葡萄牙[Portugal]、義大利[Italy]、希臘[Greece]、佮西班牙[Spain]；4個國家的頭1字英文字母合起來就是PIGS‧過去因為經濟發展順序，成長真緊，予人叫做歐洲金豬[Gold PIGS]‧現此時因為無力盛擔金融滾絞龍危機以來的衝擊，連政府亦將欲接載未牢[tsih-tsai3-bue7-tiau5]啦！歐洲金豬亦已經變成歐洲病豬囉！
歐豬4國引起世界金融的風暴到底會影響若大，全世界亦攏真緊張佇注意，頂禮拜6佇加拿大北極地區G7財政部大頭會議，討論到按怎來襁舊歐豬4國所引起的債信危機佮確保世界經濟的復甦‧
歐豬4國的名詞其實是對應著幾年前的金磚4國，金磚4國是指：巴西[Brazil]、蘇聯[Russia]、印度{India}佮中國[China] ；4個國家的頭1字英文字母合起來就是BRIC，磚仔塊的意思，4個國家土地闊，人口濟工資俗，經濟發展後，實力真驚人，尤其中國已經變成世界的工廠，對全世界的影響非常大，所以，予人叫做金磚4國‧只是是毋是正港的金磚，抑是鍍金的金磚，嘛是需要經過一段時間的檢驗啦！