jimmycmlin的部落格

新聞辭典~~~~~心碎症候群[Broken Heart Syndrom]~~~~~遊子 2010.02.10.
媒體報導：咱一般講心碎，毋是干哪用來形容表示悲傷心情的比喻爾爾，咱一般人受到真大災難性的打擊，亦是親人愛人仔的痛苦離別時，心臟的雄狂變化有影會予人無命，所以講心碎是真正會死人的喔！這種因為非常悲傷哀痛、心內驚惶、氣僨怨妒所引起來造成心臟衰竭，親像馬達愈來愈無力的症頭，醫學上叫做心碎症候群[Broken Heart Syndrom]‧
其實佇10外年前，類似的症頭佇日本已經有人發表過啦！佇彼[hit]當時叫做章魚壺心肌症[Takotsubo Cardiomyopathy]；因為患者發病時倒爿心室的收縮，看起來親像章魚壺[Takotsubo]的外型，章魚壺是日本傳統用來掠章魚[Tako]的瓦罐傢私頭仔‧
美國醫學專家講：心碎症候群就是親像心臟的”腦震盪”，是由壓力情緒所引起的心臟病，並毋是一般血筋塞著的心臟病，這兩種起因是完全無共款的啦！
心碎症候群的臨床症頭有：胸坎疼、喘氣艱苦，臨床上佮心肌梗塞真親像，毋過伊是完全心肌本身對壓力情緒的反應，心臟的收縮能力可能賰2成左右爾爾，有致命的危險，佮大條血筋塞著無關係‧尤其照統計看：有9成的患者是更年期後的查某人‧這佇目前的醫學上猶無法度來解說‧
大部份心碎症候群的患者攏會當真緊來復元，心臟亦未留下永久性的傷害‧