jimmycmlin的部落格

新聞辭典~~~~~童養媳毋是養女~~~~~遊子 2011.01.12.
媒體報導：外家不准分家產，法官判童養媳勝訴-----‧到底童養媳是什麼身份？是什麼時代背景出現的？
童養媳是古早所講：細漢飼的新婦仔啦！因為70年前的台灣社會，經濟環境普遍以農業為主，茨內頭喙濟，有寡家庭以未來予家己的後生結婚為目地，收養別家未成年的查某囡仔，進入茨內共同生活，會當節省男方聘禮佮結婚的所費，這個查某囡仔就予人叫做細漢飼的新婦仔，華語叫做童養媳；新婦仔大漢了後就佮茨內某1個查埔囡仔[一般叫做男丁]結婚，風俗上叫做sak做堆、上頭‧新婦仔變為新婦啦！
新婦仔變為新婦，養媳關係就綴著消滅，抑是，新婦仔予收養家庭半途棄媳，養媳關係亦自然綴著消滅，佇這2種情況下，新婦仔佇法律上就回轉去原本親生的父母，所以，雖然細漢予人做新婦仔，猶原有權利繼承原本親生父母的遺產‧
新婦仔猶未變為新婦時，法律上看做伊是予收養家庭來收養，法律上的父母是養父母，無論是毋是有冠收養家庭的姓，是有權利繼承養父母的遺產，但是無權利繼承原本親生父母的遺產‧
拄到法律興訟時，法官一般會採取對新婦仔較有利的方式來做判決，來認定到底誰才是伊法律上的父母。