新聞辭典~~~~~瑪痞族[mappie]~~~~~遊子 2011.01.05.
世界的時行是1陣1陣，最近看到媒體報導：樂活新勢力，”瑪痞族”興起來---‧拄仔看到嘛毋知”瑪痞族”到底是什麼？
”瑪痞族”是英文”Mature[成熟] Affluent[富裕] Pioneering[有原創力]”合起來的簡單寫為”mappie”，華語叫做”媚痞族”；是指1個人超過50歲以後，佇茨內囡仔序細亦已經大漢，隨人出去發展，讀冊、食頭路等等，家內賰2個老伴亦可能單身1個爾爾，進入一般人所講的”空巢期症候”[Empty nest syndrome]，真濟人會感覺囡仔序細無需要伊囉！生活失去重心，變成無目標，心內愈來愈空虛佮驚惶失志‧毋過，另外1陣人表現完全無共款，顛倒感覺前半世人的時間攏為家庭佮囡仔序細來犧牲，自後時間增加啦！開始落實”毋管、毋等、毋省”的原則，因為囝孫自有囝孫福，開始過著家己歡喜欲過的日子‧這陣人就是”瑪痞族”啦！
”瑪痞族”對藝術、科技、新事務有趣味，愛去國內外旅遊，想法綴著時代，甘捨會得，注重健康保健，是有閒、有錢、有健康、想會開、甘開閣會拍算的人‧
”瑪痞族”這個名詞來自北歐的瑞典，這個族群有家己的雜誌”M”，這個族群將家己定位是：有閒、有錢、亦想欲開錢渡時間的人‧雜誌”M”的編輯講：阮人數亦未少，阮真好奇，阮想欲對發生的代誌有影響，所以愛參與，自以早的嬉痞族[hippies]、來到後來的雅痞族[yuppies]，到即陣的瑪痞族‧
現此時的60歲，逐方面就親像以前的40歲時相共，俗語講：上40[念siap]未liap8‧現此時的60歲猶原充滿活力佮熱情，無論查埔、查某攏共款‧
如果講1980年代時行雅痞族[yuppies;Young Urban Professional]，進入1990年代換時行頂客族[dinky;Double Income No Kids]，双薪的家庭無欲生囡仔，照按呢看，自即馬開始未來10年，可能是瑪痞族會愈來愈時行，予愈來愈濟人接受的趨勢‧
古早孔子公講：30而立，40而不惑，50而知天命，60而耳順，70而隨心所欲‧踮現此時可能攏需要調整囉！現此時可能是：30猶原沐沐泅，40而立，50而不惑，60而隨心所欲，70而耳順，80而知天命，90準備上天堂‧古早40就算中年啦！即馬，上早是50才算中年，平均壽命80歲左右，人生的路猶有一大截，所以，瑪痞族的想法佮做法是正確的，嘛相信你我嘛攏會當認同佮接受，咱嘛來綴著時代的腳步行，做1個快樂的瑪痞族‧
全站熱搜
留言列表
