jimmycmlin的部落格

用藥保健~~~~~塵肺症~~~~~遊子 2009.01.04.
網路頂有流傳講：參有竹炭的食品食落腹內，有可能得到塵肺症‧毋過，專家佮學者講：免驚啦！
到底什麼是塵肺症？
醫學上的塵肺症是指長期由鼻空亦是喙空吸入有機粉塵亦是無機粉塵，吸入後無法度順序來排除，日久月深愈積愈濟，攏積佇肺部內所引起的症頭‧
大部份的塵肺症是因為工作上的關係，長期處佇粉塵真厚的環境中，吸入有機粉塵亦是無機粉塵，對肺部造成傷害，受到傷害的嚴重程度佮粉塵粒子的大細、種類、吸入時間的長短等等，攏有真大的關係‧上倢看到的塵肺症有：矽肺症、挖土炭的炭坑工人塵肺症、石棉工廠的工人佮接觸石棉產品的工人出現的石棉沉積症‧
佇臨床上的表現是喘氣艱苦、長期慢性咳嗽、烏色亦是貓鼠仔色的痰濟、定定感覺胸口綁綁‧有時又閣合併出現肺氣腫、肺癆、肺癌等等‧
目前對塵肺症猶原無特效藥，無法度予塵肺症的患者恢復正常的喘氣功能，所以，平常時佇工作場所就一定愛做好防護措施，頂真做好預防的事誌，上好是避免佇粉塵真厚的環境中工作、生活‧
專家佮學者嘛講：塵肺症是由吸入引起，並毋是食落腹內由消化道吸引做成；毋過，商品竹炭宣傳會使排除體內毒，其實伊佮醫療用藥品級的活性碳，效果是1丈差9尺啦！病院使用佇中毒患者的是藥品級的活性碳，是經過高溫、高壓製造，1公克的活性碳，產品面積達到1個跤球場赫尼阿大，所以，會使用來急救，減少中毒患者體內吸收毒物‧
抑準，竹炭商品宣傳真正會使排除體內毒物，按呢每工食，嘛有可能吸收體內營養份，同齊佮毒物排除去體外，造成營養不良啦！所以，竹炭商品宣傳做宣傳，消費者愛較巧著，罔參考趣味就好，毋通白白開錢無應效。