jimmycmlin的部落格

咱的台灣~~~~~逐家來了解平埔族群(1)~~~~~遊子
咱台灣上古早的原住民族群，以有文字記載來講，就是平埔族群啦！台灣的平埔族群
是南島語系民族的一支分流，可能佇5000年前~2500年前中間，遷徙移入來台灣‧
有關台灣平埔族群的分類，無共的人類學家有無共的講法，大概有7~10種，到1990
年初，嘛有人提出是7族14分支的講法‧即馬，就採用卡大多數的人所認同的李亦
園教授的研究分類來說明‧
漢人過烏水溝移民來台灣了後，和平埔族的人接觸著真密切，嘛愈來愈密(bha)，頭先
漢人卡少，隨著時間久長，漢人愈來愈濟，平埔族群的傳統文化，漸漸就佮優勢的漢
文化交參而且真緊就互漢文化同化去啦！又搁加上異族通婚的關係，平埔族群的人就
漸漸融入去漢人的系統內，上續尾，連傳統文化佮話語嘛攏拍無去啊！
按照李亦園教授的研究分類，平埔族群會當分做下面的種類：
葛瑪蘭族(Kavalan)：蹛佇蘭陽平洋‧其中的猴猴族原本蹛佇花蓮立霧溪的中上游附近
，因為受到泰雅族(Atayal)的壓迫，才遷徙向東和向北，差不多佇300年前才進入宜
蘭縣內‧
雷朗族(Luilang)：主要蹛佇台北盆地和桃園附近‧
凱達加蘭族(Ketagalan)：主要蹛佇台北北爿倚海邊、金山、基隆‧
道卡斯族(Taokas)：主要蹛佇桃園、新竹、苗栗地區‧
巴則海族(Pazeh)：主要蹛佇台中盆地‧
巴布拉族(Papora)：主要蹛佇台中倚海邊的清水、梧棲‧
巴霧查族(Babuza)：主要蹛佇大肚溪以南佮濁水溪以北地區‧
和安雅族(Hoanya)：主要蹛佇雲林和嘉義地區‧
西拉雅族(Siraya) ：主要蹛佇台南、高雄、屏東地區‧族群卡大，搁分做西拉雅族、
大滿族(Dabhan) 、馬卡道族(Makadau)等3個亞族，分別蹛佇佳里、萬丹、阿猴(即
馬的屏東)、林邊、里港、新園地區‧
邵族(Sao)：主要蹛佇日月潭周圍地區‧魚池、貓瀾、水社、石印、茅埔、頭社等地區‧
自17世紀起頭，平埔族群主要分佈佇台灣西爿的平地為主，由明朝鄭成功開始，一直
到清朝統領時陣，漢人大量遷徙移入，平埔族群就開始受到漢文化的衝擊，佇土地的
開墾、土地的買賣交易、一般商品的交易等等，競爭愈來愈厲害，外來因素互in的生
活環境改變，佇日常的生活上佮經濟交易上，互in感覺無向漢人稍學寡仔﹝勿會﹞
用哩！不過，佇現實的競爭生活中，無法度拼贏漢人，就漸漸遷居移徙，愈遷愈偏僻
，愈徙愈深山‧為著族群的生存，雖然怨嘆無奈，猶是無法度啊！
就平埔族群遷徙的歷史來看，佇19世紀嘉慶、道光年間上接，李亦園教授的研究中
有指出，卡有規模的遷徙共有4擺‧(1).中部的平埔族遷徙去宜蘭縣內‧(2). 中部的平
埔族移居去埔里盆地‧(3). 葛瑪蘭族徙去花蓮、台東‧(4). 西拉雅族徙去東部‧其中
以(2)的規模上大‧嘛會當看出迄時陣，平埔族佮漢人相爭有若阿激烈啊！
自早就講：有唐山公無唐山媽‧所以，除了1948年以後遷徙入來的新住民以外，咱
逐家可能攏有平埔族群的血統基因喔！所以，咱應該愛了解認識平埔族群的代誌‧
﹝本文是參考原住民委員會網頁的資料﹞