jimmycmlin的部落格

咱的台灣~~~~~草山溫泉~~~~~遊子 2008.01.27.
草山現此時予人改名叫做陽明山，講是欲紀念明朝的學者王陽明先生才來改名，毋過，
王陽明先生佮咱的台灣亦無什麼關係，實在無什麼意思，顛倒失去了先民原本號名的本
意，叫草山亦是較親切、較有意義啦！
草山位佇大屯山火山脈地區，草山溫泉就是佇草山公園內，即馬的國立陽明山風景區，
分做前山溫泉區佮後山溫泉區兩部份，溫泉區的四箍輪轉攏是景緻真正嫷的天然風景，
若仔遮迷人耶！來遮是洗溫泉兼欣賞嫷風景，真正是一兼二顧，摸蜆仔兼洗褲啦！
草山溫泉的水質嘛分做2款：白磺泉佮青磺泉，毋過，是以白磺泉為主‧因為火山地熱
運動無共的關係，造成逐山區溫泉水的成份無相共，水溫的燒熱、洗了治療的效果，嘛
有淡薄仔精差，隨區有隨人的特色‧袂到風景區時，遠遠就會當鼻到硫磺tshiang3鼻
的味，尤其佇寒天時，予人真想欲趕緊跳入去溫泉池，好好仔來享受‧
溫泉區有分大窟池佮細窟池，嘛閣有分做愛穿泅水衫閣攏無穿衫兩種，嘛閣有分做室內
池佮室外池，亦是大人池佮囡仔池等等；較無膽、較pi3-su7的任就去洗室外個人池，
亦是室外愛穿泅水衫的細窟池；真正依照日本人的習俗，是室外無穿衫的大窟池喔！佇
咱台灣是查埔、查某分開洗，門口的布條仔寫著大大字的”男湯”、”女湯”；聽講有
的所在亦有查埔、查某同齊無穿衫做伙洗喔！這佇咱台灣是無允准的啦！咱的風俗嘛無
法度接受；毋過，愛穿泅水衫的室外大窟池，是查埔、查某、大人、囡仔攏鬥陣同齊做
伙洗喔！規家伙仔大大細細會使洗甲真歡喜耶！
佇溫泉區洗煞猶會使泡茶、食土雞仔佮山頂野菜的料理，算是真享受的歇睏好所在，所
以，歇睏時定定嘛塞車喔！