jimmycmlin的部落格

莊子講(35)~~~盜亦有道~~~遊子
盜﹝足石﹞是古早時代的1個大盜頭‧
有1工，伊的跤仔就問伊講：敢問大王，咱盜甘嘛有道？
盜﹝足石﹞大聲應講：當然有阿！咱欲做大盜的人，會當
先臆測出房間內的金銀珠寶藏佇叨位？這叫做”聖”；欲
偷提物件時，會當一馬當先，搶先行，這叫做”勇”；偷
提完了後，會當予別人先走離開，家己才上續尾仔走，這
叫做”義”；事先愛會曉做出正確的判斷，看即擺是毋是
會當順序下手，這叫做”智”；將偷提來的物件，真正公
平來分予逐家做伙的伴，這叫做”仁”‧抑是無法度具備
這5項要件”聖、勇、義、智、仁”，欲想做1個大盜是無
可能的事誌啦！
所以講：善人抑是無法度得到聖人之道，是無法度變成善
人啦！共款的事誌，歹人抑是無法度得到聖人之道，嘛是
無法度變成歹人啦！但是，咱看社會中抑是善人卡少，歹
人比較卡濟，按呢，聖人之道對社會國家來講，就變成害
多利少喔！
咱來看聖人的道德規範，嘛定定予歹人提去做in的保身符
，歹人抑是無藉著聖人的道德規範，可能嘛無法度變做1
個大歹人啊！咱人欲做好做歹，實在是一念之間啦！