台語文~~遊子的網誌度晬的感想－jimmycmlin的部落格

台語文~~~~~遊子的網誌度晬的感想~~~~~遊子

日子過著有夠緊，即個園區開展到今，一目﹝目聶﹞嘛欲度晬、滿1年囉！

斡頭轉來看上頭開張的起頭文章，家己心內才愛笑‧戇戇仔做，恬恬仔學，嘛漸漸踏出一屑仔跤跡，無去予時代的大輪仔輾扁去，猶扭有到科技時代進步的尾溜，好佳在！這上愛感謝阮查某囝仔in的鼓勵和幫忙，予我勇敢踏出第一步，續落來搁敢慢慢仔繼續行‧

園區經營一段時間了後，實在講，無什麼信心啦！因為一直無什麼起色，佇7月初7猶寫著1篇”無名誌下獨啄”，有影感覺孤單孤單，雖然，查某囝有建議我按怎做，有1工，是7月16日，台灣囡仔TWKID san來行踏並留言了後，換我去伊的園區參觀瀏覽，才雄雄發現寫台語文的網頁真濟，真正予我想﹝勿會﹞到，尤其少年人嘛真濟，予我的眼界拍開啦！我就寫1篇”真意外嘛真歡喜”，所以，第二擺愛感謝的就是台灣囡仔TWKID san啦！

自按呢以後，我就搁卡認真拍拼，將生活中咱喙講的事誌、目睭看到的事誌、耳仔聽的事誌、古早人講的事誌、現主時逐個關心的事誌等等，規劃做幾個仔方向來寫：有新聞辭典、用藥保健、台語文七字仔詩、散文、感想文章、別人寫作的好文章整理做轉載、莊子講的思想文章、旅遊心得、囡仔歌、台語演講稿、咱的台灣相關的資料等等，因為話語是有活力的文化傳承行為，愛予現主時的人佇日常生活中用會到、感覺會到，才是有路用的話語，抑無就變成古董，漸漸無人講、無人用、無人寫，到尾仔一定拍毋見了了啦！

嘛感謝真濟網路頂的朋友來行踏指教；網路的影響力有影大，定定看到媒體報講某一個”部落格”1工有幾萬人入去，鬧熱滾滾；佇聖誕節前仔迄禮拜，因為”歡喜聖誕節”(台語版的Jingle Bells;王金選先生作詞)，上濟1工有3000人入來，討音樂檔mp3的朋友嘛真濟，佇平安暝迄工，某電視台嘛報講”歡喜聖誕節”(台語版的Jingle Bells;王金選先生作詞)佇網路頂真熱門喔！不過，咱愛尊重智慧財產權，所以，某廣播電台欲要求公開播放，我請in去和出版公司參詳，我無法度做主‧所以講，網路科技有影真厲害啊！