jimmycmlin的部落格

莊子講(36)~~~黃帝問道廣成子~~~遊子
黃帝坐位19年，教化大行佇天下‧即時陣，伊聽講廣成子已經修得大道，
伊就親身上山磕頭，欲向廣成子問道‧
黃帝問講：我想欲用天地的精氣，來調和陰陽兩氣，來幫助五穀緊熟；嘛
想欲來幫助百姓調養性情‧按呢甘對？
廣成子應講：你想欲利用天地的精氣來幫助萬物成長，按呢是顛倒害著in
啦！想欲用人的智力去改變人間事，就親像扭秧仔來幫助伊緊大叢共款，
有效無？你甘無了解？
黃帝聽了後，感覺跤冷手冷，心內想無步；隨後就退位，放sat天下，去
到荒野偏僻的所在，恬恬仔踮hiah蹛3個月，家己佇思考，想講按怎來修
身，才有法度保持永久？大道在伊看來猶原是渾濁無清，無明嘛無暗‧
上續尾悟到講：大道的精氣，應該盡量放空心內的一切，﹝勿愛﹞用目睭
去看、﹝勿愛﹞用耳仔去聽、﹝勿愛﹞用心去想；抱神以靜，形自然企正
；只要形神抱元為一，無知無我，一切順應自然，參與自然，合而為一，
就自然會當保持永久啦！