jimmycmlin的部落格

轉貼台語文~~~~查某囡仔佮老大人~~~~林天從寫作(學員同齊整理)2008.01.24.
有1工閒閒無代誌，坐公車去市內，想通吸一下仔鬧熱街仔路的空氣，拄著1個予
人真感動的場面‧
1個查某囡仔的學生，上車就緊揣1個位坐落去，讀規工的冊可能感覺真悿，拄想
欲啄龜一下仔，無意中看到坐佇隔壁看冊看甲足專心的老阿伯，無張弛將冊籤落
落去土跤，學生囡仔亦趕緊出手去鬥khioh起來，還予老阿伯，老阿伯應1聲：”
勞力啦！多謝你‧”閣繼續看伊的冊‧
目前咱的社會，平常時老大人看冊的人無蓋濟，閣較免講利用坐車時短短仔的時
間，認真看冊是真可取，所以，學生囡仔對伊產生好奇佮尊敬，同時亦關心老阿
伯的一振一動‧老大人的正手看起來好親像淡薄仔無自由，翻冊時陣無什麼方便
，真食力的款‧查某囡仔干哪想欲幫忙老大人，真自然就伸手去替伊掀冊，老大
人受到鬥相共，感覺真意外，滿面的歡喜，連續講：”啊！多謝你，歹勢啦！”
經過無若久，老大人甲冊收起來，到後一站的車牌仔時，竟然兩蕊目睭含著目屎
對查某囡仔講：”足乖的學生囡仔，多謝你囉！”這當陣，佇查某囡仔的心內，
嘛親像bun3出一陣熱血，滿腹tshiang7-tshiang7滾，目睭看著老阿伯就欲落
車，心內擋袂tiau5，隨大聲喝出：”阿伯！加油啦！”不知不覺中，查某囡仔
的目睭嘛感覺濕濕tam5-tam5囉！心內的感受可能從來嘛毋捌遮尼阿溫暖過‧
真正的關愛佮幫助，毋哪是扭倚互相心靈間的交流，閣會當感受到真心歡喜的意
義。
補註：這是研習營第4工下晝，由盧廣誠老師講課時提供的文章，是刊佇蓮蕉花
台文雜誌內底，予在場學員討論，隨人提出用字、用詞、口氣等等無共的看法，
上尾仔整理出這個結尾文章‧