轉貼台語文~~翁仔某面－jimmycmlin的部落格

(頭前面看起來是查埔)
轉貼台語文~~~~~翁仔某面~~~~~(stanley原作華文;遊子整理) 2008.02.02.
“哇~~!哇~!恁兩人真正有翁仔某面喔！”
每擺聽到即句話，嘛毋知到底是佇o-lo2？抑是欣羨的？我總是會淡薄仔歹勢來看你
，看著你嘛共款攏是面仔稍可仔紅紅‧
換勢，是你有1個秀氣的面腔‧
換勢，是我較愛粧做中性的打扮‧
好佳哉，你秀氣的喙目鼻子，予我聽到咱有翁仔某面時，心內袂講傷過頭失望‧
顛倒，亦有一屑屑仔偷偷仔的歡喜，微微仔浮佇我的目頭頂‧
我恬恬仔企佇鏡的面頭前，詳細看家己的面腔，閣斡頭過去看，非常頂真來看紋紋仔
笑的你‧
“咱甘真正有翁仔某面？”我頭仔khi-khi，心內無什瞭解來開喙問‧
“戇姑娘仔！”你總是愛拍我的額頭，輕輕仔撥開我的頭毛尾仔，恬恬仔企我的額頭
頂tsim一下仔‧
我閣斡過頭轉來，兩眼釘著鏡內的我家己‧
佇彼一目(目聶)時，看到鏡內的家己，親像寬寬仔浮出你的面腔囉！
我親像看到啦！你深深倒凹的兩蕊目睭仁，反影佇我癡望的眼神內‧
我親像看到啦！你淺淺的酒窟仔，參入來我紋紋仔的偷笑內‧
我親像看到啦！你一陣一陣的溫柔體貼，予我浸佇講袂出的幸福中‧
“是啊---！咱有影真正有翁仔某面啊！”我看著鏡內的he個你，家己喙內細聲仔講‧
又過了幾仔年囉！你猶原是你，我猶原是我‧
只是，你已經毋是我的你‧
我？嘛已經是別人的我啦！
佇hit工，踮街仔路拄到你，亦有身邊你的伊‧
我輕輕仔對你tim3著頭，閣偷偷仔睨一下你身邊的伊‧
原來，世間上毋是干哪只有我佮你有翁仔某面爾爾----。
補註：
即篇是第3工研習營由宋澤萊老師提供的作品欣賞之一‧
是真正短的文章(華語叫做"極短篇")‧