jimmycmlin的部落格

咱的台灣~~~~~愛國獎券~~~~~遊子
即馬，咱看到台灣和世界逐所在，真濟人攏在痟樂透獎、買彩券、簽六合彩、大家樂等等，
嚮望一瞑轉好額；其實咱台灣在古早專制戒嚴時代，嘛有推出愛國獎券喔！可能30歲以前的
少年人就毋知影愛國獎券是什麼囉！
話講起：自民國34年(1945年)，國民黨政府奉聯軍統帥之委託令來接收台灣，大戰結束的
起頭，台灣的建設經費不足，國民黨政府就委託台灣銀行在39年(1950年)4月1日正式發行
彩券叫做愛國獎券‧專制戒嚴時代連博儌嘛要講是愛國‧
第1期干哪發行1萬張，1張欲賣新台幣15箍，hit時陣拄仔好是強制將舊台幣4萬箍換新台幣
1箍，所以，民間續喙喝：4萬換1箍的口號，一直到解嚴後猶原無法度放袂記得，莫怪即馬
錢又變薄，又將新台幣1萬叫做1箍，真驚歷史復重演，he就苦啦！
因為hit當時的15箍真正大，會使予1家伙仔8口人來生活10工的所費，所以，真濟人買袂起
，予第1期的愛國獎券銷路無好，在庫賰真濟；第2期開始才降落來1張賣新台幣5箍，卡符合
hit陣仔的生活水準，予卡濟人甘來買，以後的銷路才漸漸穩定和增加‧不過，到底是博儌
性的彩券，中獎的人亦是佔少數，雖然第1特獎有20萬箍，結果是愛國的人卡濟，在民間又
續喙時行講：5箍20萬！5箍2隻蚊子啦！後來，”5箍2隻蚊！5箍2隻蚊！”嘛綴著愛國獎券
來流傳‧
來到民國76年(1987年)，因為民間大家樂的對獎依附在愛國獎券的開獎，造成真濟社會困
擾問題，嘛予愛國獎券的發行受到真濟批評，續尾在共年的12月27日發行上尾仔期，總共發
行1171期的愛國獎券，就按呢行入去歷史啦！