jimmycmlin的部落格

莊子講(5)~~~~~無用的大叢樹~~~~~遊子
惠子對莊子講：拄仔佇路邊看到1叢大叢樹仔，伊的大樹身生出真濟大細粒的
木瘤，牽來拖去，無一位直直，無一所在平平，另外卡細枝的樹仔枝，嘛是攏
彎彎翹翹，歪歪斜斜，完全無合著木匠師的繩墨規矩；所以，即叢大叢樹仔一
直生佇路邊，自然無任何的木匠師會去看上眼、去插伊‧即馬，你講的話就親
像hit叢大叢樹仔共款，雖然大聲，不過無路用，有誰會來採信呢？
莊子應講：你甘無看過狐狸和野貓，為著討食捕食，跳懸跳低，zong來zong
去，in的功夫甘毋是真好？結果耶？定定中著機關，死佇陷阱底；抑是犛牛耶
，身體非常大，親像由天頂垂落來的一塊雲，但是，無法度去掠鳥鼠‧即馬，
你煩惱即叢大叢樹仔無路用，其實，你會當將樹仔跤整理互清清氣氣，搁囥幾
粒仔大、細石頭，互人踮樹仔跤坐涼、泡茶、開講、歇睏，甘毋是真好的代誌
？既然木匠師看無上目，自然﹝勿會﹞去將伊剉去做材料；大叢樹仔免煩惱互
人剉掉，伊對木匠師來講是“無用“的，這個“無用”對大叢樹仔來講是非常
有用耶！是伊的保命護身符喔！這就是“無用之用”啊！