jimmycmlin的部落格

莊子講(30)~~~子桑唱貧窮的歌~~~遊子
子輿和子桑是好朋友‧有1擺連續落幾仔10工的雨，子桑想著子輿平常時生活卡艱苦，
就紮淡薄仔錢去看子輿‧一入in兜的門，就聽到子輿佇哀天叫地‧
子輿喝講：阿爸啊！阿母啊！天公伯啊！土地公啊！
子桑續喙問講：你是按怎樣？
子輿應講：我發病幾仔工啦！我心內一直想，是什麼人予我遮尼阿散赤，生活艱苦？
甘是阮阿爸阿母？抑是天公伯？土地公？父母對我並無私心，應該﹝勿會﹞虐待我；
天地對我嘛無私心；按呢講，我會散赤，生活艱苦，一定是我的命啦！
其實，咱定定講命運、命運，是分做命和運2項事誌才對喔！咱家己無法度選擇的是
命，是先天註定的，無法度去改變；親像血緣身世，生做皇家囝，就是太子，生佇乞
食寮，就是乞食囝‧所以，人愛先知命、安命，以道為友‧
不過，運是後天的，是隨時佇改變，俗語講：3年1輪，好歹較輪‧只要咱家己有心，
乞食囝、艱苦囡仔肯將食苦準做食補，無暝無日認真拍拼，總有出頭的1工；散赤家
庭的囡仔嘛會當做律師、做總統，這嘛是實在的例啊！
咱毋通失志，應該知命，不過，無免認命，運是掌握佇咱家己手底；一支草一點露，
天無絕人之路啊！