jimmycmlin的部落格

莊子講(45)~~~~~井底的蛙仔~~~~~遊子
東海有1隻大甲魚，有1工，無意中行到1口井邊，聽到井底有歡喜唱歌的聲音，
就好奇探頭看著‧
井底1隻水蛙仔大聲喝：罕行喔！稀客、稀客，緊請入來坐啦！
大甲魚微微仔笑講：你踮井底日子過著好麼？
水蛙仔應講：我獨霸即口井，每工親像做王共款，無人相爭，當然過著真爽快啊！
我跳落水底，清水就來扶我的跤，鑽入去卡深的所在，露糊仔靡就對我的跤來掠龍
，到暗時，我就跳出去井口外爿，躺佇井框頂看月娘，吹清風，漸漸就入眠做嫷夢
，天光後，跳落去井邊的草埔仔，散步看風景；每工按呢，一直感覺真快樂！不過
，我看到井水底的細尾魚仔、細隻螃蟹、細隻肚蛙仔，就替in可憐，in的天地赫尼
阿細，赫尼阿狹，應該無像我遮快樂‧怎樣？欲入來坐坐、參觀？
大甲魚笑笑仔講：你的井傷細口，我根本無法度入去‧
水蛙仔應講：我的井已經算遮大啊！按怎講是細？有什麼比我的井卡大？
大甲魚續落去講：欲講著大，東海才是真正大‧東海又大又闊又深，用1千里的長，
嘛無法度來表示伊的闊佮大，用8千尺懸，嘛無法度來量出伊的深度；會記得佇夏禹
的時代，10年中有9年是做水災，但是，東海的水量無什麼增加；商湯的時代，8年
中有7年是渴旱，不過，東海的水量無什麼減少‧親像東海才是大啊！你即口井欲算
什麼？
水蛙仔心內不服，應講：騙siau的！
所以講：井的範圍束縛著水蛙仔的眼界，共款的事誌，知識嘛束縛著人的想法‧雖
然，增加知識予人感覺卡偉大，不過，知識嘛會予人渺小‧所以，咱一方面愛追求
知識，一方面愛超越知識，知識和智慧無共，毋通讀冊讀去尻脊piaN去，愛做1個
有智慧的人‧