jimmycmlin的部落格

新聞報導：咱台灣昨昏下晝開始氣溫漸漸降低，水氣又閣配合真充足，由宜蘭太平山的翠峰湖tshua7頭上早落雪，其他親像陽明山、桃園拉拉山、新竹尖石、汐止姜子寮山~~等等是開始落霰爾爾，有人叫是落雪，其實雪佮霰是無共款喔！

過一暝了後，透早網友就歡喜分享逐所在的雪景，400公尺以上的山區攏會當欣賞到落雪佮耍雪，大人囡仔攏毋驚寒真歡喜，因為這亦是咱臺灣位置亞熱帶地區10年來上強的寒流啊！

雪佮霰是無共款喔！是按怎無共款？

雪一般是出現佇攝氏零下5度以下時！伊是六角形的結晶，重量較輕，由天尾頂寬寬仔、慢慢仔飄搖落落來地面。

佇0度~零下5度時，會當看到雪佮霰（華語佮台語的音同線）參濫著落落來

 。

霰是無透明較硬的冰水塊，所以比雪較有重量，落落來地面的速度亦較緊。

其實佇0度~零下5度時，亦定定會當看到冰珠，冰珠比霰閣較紮實、閣較有重量，落落來地面後亦較袂破碎去。

水氣拄到冷空氣時，亦可能會變成霧淞佮霜，霧淞定定結佇樹仔枝椏、樹葉仔等等樹叢上，霜是結佇其他所在，茨尾頂、地面上、草仔埔、柱子跤邊等等。