台語文~~~~~坐台灣高鐵的感想~~~~~遊子
真早就聽過日本的新幹線是走真緊的電車，後來又閣有南韓的高鐵、歐洲大陸的歐洲之星高速火
車，幾年前中國上海由德國人起好磁浮列車等等，咱台灣總算嘛起好高速鐵路，而且佇今年開始
運轉走行，一直揣不機會去坐看覓，照講這應該是咱台灣的驕傲才是，毋過，有特別立場的媒體
批評甲無一塊對，甘有影親像媒體批評的按呢？親身試坐看覓，應該是上好的見證啦！
10月中拄仔有機會，拜託查某囝佇2禮拜前先預訂2張往回的車票，想到2個老的會始閣來渡蜜月
旅行，車票買了後就真歡喜，一直佇期待，親像細漢讀冊欲去遠足的心情共款‧尤其高雄又算是
我的第2故鄉，大學讀冊蹛4冬，高雄港市應該改變真正濟才是啊！
提早到桃園高鐵車頭，起佇往桃園國際機場的半路，大眾交通實在無方便宜，後來捷運系統起好
才會改善，聽講高鐵的準點率達到99%外，接近純金999的程度，實在予人真會o-lo2啦！車頭內
的人袂少，有的是公務出差、有的是家族旅遊、嘛有工廠亦是公司的員工旅遊、學生囡仔歸陣的
旅遊等等，真鬧熱；看到逐家歡歡喜喜，有講有笑，互相攝相做紀念，可能真濟人是像阮頭一擺
坐高鐵的款‧
電車真正是準時入站嘛準時開車起行，嗯！車內的感覺和台鐵就是無共，親像坐飛機，尤其便所
就完全佮飛機頂的相共，座位闊、清氣、無什麼雜音，電話、自動販賣機等，算是方便啦！
椅子坐未燒就到新竹站，有影緊啊！即班是逐站攏停的車班，沿路有：新竹站、台中站、嘉義站
、台南站佮上尾的高雄左營站；沿路速度維持佇時速260~280公里中間，佇嘉南平洋時達到時速
296公里喔！莫怪只停板橋站和台中站的車班，免2點鐘就到囉！高速走行時，車身平穩，逐方面
講來，攏綴會到世界標準，毋知，有特別立場的媒體為什麼欲批評甲無一塊對？是袂當看到台灣
的進步？干哪會曉唱衰台灣爾爾！
台灣高鐵是咱台灣的驕傲才是，和台北101、蔣渭水高速公路的雪山磅空等等，攏是予全世界看
會到的台灣驕傲！讚啦！
留言列表
