jimmycmlin的部落格

台語文用藥保健~~~~~創傷弧菌~~~~~遊子
前無外久在澳洲世界出名的鱷魚先生死亡，就是因為稍可仔的細空喙無注意，
引起全身性的敗血症來往生，原兇就是創傷弧菌；咱嘛定定看到新聞報導：有
人無細膩處理海鮮類時，予魚蝦刺到，嚴重時要截肢亦是連命嘛休去，這嘛是
創傷弧菌造成的‧聽到實在予人真驚惶‧創傷弧菌是什麼款？
創傷弧菌嘛叫做海洋弧菌，和霍亂弧菌、腸仔炎弧菌併列為3大弧菌，一般是
生在熱帶和亞熱帶地區的河流佮海洋交參的所在，是全球重要的海洋致病細菌
之一，尤其氣候卡溫暖的季節時，海口內的海洋弧菌濃度卡懸‧


預防海洋弧菌感染上好的方法就是：食海鮮料理時，一定攏要煮予熟就保證無
問題‧在鼎底滾3~5分鐘，就會當徹底殺死海洋弧菌‧平常時要小心細膩的是：
接觸亦是處理海鮮類時，上好要戴厚質手套亦是用夾子，會當避免魚鰭、尖的
硬殼刺受傷，引起海洋弧菌感染；另外，肝無好的人，免疫力無好、有慢性病
、抵抗力差的人，去海邊戲水時，要避免受傷，抑準有傷口，一定毋通將傷口
浸泡在海水底，萬一空喙附近開始紅佮腫，而且愈來愈擴大，就應該趕緊去病
院診斷治療才是‧因為海洋弧菌的毒性大，抑準受到感染，無做適當治療時，
致死率達到5成；抑是發生休克，死亡率達到9成喔！所以，才有奪命刺客的稱
呼，絕對要注意‧


受到感染時的症頭有：吐、漏洩、發燒、畏寒畏冷、皮下出血、傷口出膿等等
，嚴重時出現休克；目前的治療方式是：用第3代抗生素和四環黴素為主，必
要時才配合外科手術，徹底清除傷口，才會當避免截肢來保命‧
所以，咱去海邊戲水時、去水族館參觀時、去菜市仔買海鮮類時、在茨內處理
海鮮類時，攏一定要小心細膩啊！