jimmycmlin的部落格

台語文~~~~~洗衫~~~~~遊子 2008.01.24.
捾{kuann7}著1大桶垃圾衫，陪著牽手行到4樓頂的洗衫仔間，有稍可仔喘，看到牽手已經
拍開全自動洗衫仔機的面頂蓋，伊先看有偌濟垃圾衫，才順手捘{tsun7}好欲放水量的巡，
開始聽到tshienn3-tshienn3流的水聲，續落下雪文粉閣撓{la7}予散，才開始甲1領1領
的垃圾衫囥落去洗衫仔機內底，毋過，看伊會甲一寡仔衫，先囥落去大細無共的網子內，我
感覺真奇怪‧
就問講：”呔愛遮尼阿麻煩，毋是做1下囥落去就好？”
牽手隨喙應講：”無喔！較好布料的衫仔褲愛按呢才會用哩，抑無，洗無幾擺就拍損去啊！
遮無採‧”
上尾仔閣看伊甲1種膏膏的物件倒入去正中央的心內，我閣感覺真趣味，問講：”毋是有下
雪文粉囉！為什麼愛閣倒這？”
伊應講：”你毋知啦！這是軟洗精，垃圾衫先洗過1擺，才閣用這汏{thua7}，清氣衫仔較
蓬鬆、味較好‧”
喔！原來鳥鼠！洗衫實在嘛是1樣學問啊！會記得以前，囡仔細漢時是用双槽的，1個洗衫，
1個脫水，即馬，電器進步到1個槽爾爾，又閣是全自動，放水懸低會使調整，被單、床巾、
毯子、窗子門布等等，攏嘛無問題，照常洗甲清氣溜溜，沖洗力頭大、自動排水閣放水、自
動脫水，脫甲乾乾乾{ta-ta-ta}，比咱用双手捘{tsun7}閣較乾‧即馬，哪洗衫嘛會使哪
做別項代誌，洗衫的穡頭實在有夠輕鬆啦！
微微仔冷風對窗子外吹過來，凍入面底皮，予心肝扭一下，頭殼內出現著阮細漢時，阿母洗
衫的情形-----‧
阮兜蹛佇街仔底，彼當時已經有牽水道水，每工透早，有時陣是暗時，阿母會蹲{khu5}佇
tshim-tshenn2，先甲規家伙仔的垃圾衫囥落大跤桶，續落才落{lau3}水，為著欲省水，
攏嘛捘{tsun7}細港細港，面頭前khue3一塊tshu-tshu的洗衫板，用粗雪文來洗衫，1領
1領lu3，1領1領洗，較垃圾的閣用洗衫棍子大力ham2、大力摃，續尾1領1領用清水thua7
，上尾仔閣1領1領用双手捘{tsun7}予乾，才換去竹篙lenn5‧規家伙仔10外個人的衫仔褲
是一大堆，欲洗完閣洗予真清氣，實在嘛真食力，阮想講：”衫洗好阿母一定腰酸背疼，患
勢是會呼{koo}雞袂歕火‧”毋過，親像毋捌聽過阿母哼{hai}1聲仔艱苦‧阿母講：”為著
咱規家伙仔的健康，這無算什麼啦！”
有時陣拄到欲洗被單、床巾、毯子、窗子門布等等時，阿母會喝講：”恁遮個大細漢囡仔，
過來鬥踏踏著‧”過無若就又閣喝講：”來，逐家閣來鬥捘{tsun7}予乾‧”阮攏真歡喜會
使來鬥相共，雖然是7跤8手，嘛是做甲笑嘻嘻！
後來，我的頭殼內閣出現著阮細漢時倒轉去庄跤的情形-----‧每擺歇寒亦是6月當歇熱時，
雖然，坐輕便愛行較遠的路，毋過，只要阿爸有閒，攏一定會用伊上phann7的”烏都(禾黑)
{bai2}”載阮轉去阿公佮大伯蹛的庄跤，250cc的”烏都(禾黑){bai2}”，佇彼當時親像
即陣所講的”双B”喔！
到位時，阿爸攏先甲”烏都(禾黑){bai2}”停佇崁頂的青仔樹跤，先對邊仔土地公廟的土地
公拜拜請安佮答謝，才順著落(山奇){kiah8}的細條石頭仔路行落去，崁跤有溪水流過，溪
水清氣甲看會到底，清清的水底有大細尾魚仔、蝦子，1陣1陣泅來泅去，阮愛行過溪頂的細
板柴橋，才有法度過岸‧有時會拄到阿姆蹲{khu5}佇溪仔邊洗衫，有時嘛佮厝邊的阿桑做伙
較有伴，嘛較鬧熱，阮會大聲喝：”阿姆你好！阮閣轉來啦！” 阿姆嘛大聲歡喜對阮拍招呼
‧
阿姆(人因)攏蹲{khu5}佇大粒的石頭頂，用另外一粒較平的石頭做洗衫板，1領1領寬寬仔洗
，規陣哪洗哪開講，講甲喙笑目笑；日頭赤炎炎、水青的天、白白的雲、規片金黃色飽tinn7
飽tinn7的稻子、青翠的菜股、樹仔頂的鳥仔聲、土狗仔吠(pui7)的聲、一陣一陣的涼風，
參著水流聲佮阿姆(人因)的講笑聲，這是若仔嫷的1幅{pak}圖啊！抑準，我會曉畫圖，一定
甲伊畫落來‧雖然無法度畫做圖，毋過，過了幾十年囉！這個嫷景緻猶原深深藏佇我的頭殼底
，三不五時就出現佇我的眼前，實在予人懷念啊！

補註：即篇文章刊出佇海翁台語文學第75期(2008.03.)的散文部份‧