台語文~~~~~茨尾頂的花園仔~~~~~遊子
市內的街仔路滿兜位攏是紅毛土起的樓仔茨‧
公園無講真濟，為著道路拆闊，將路邊的大叢樹仔剉了了‧
上無嘛有十幾仔年的樹仔，實在真無彩‧
安全島頂面新種的樹仔，互滿天的土粉仔蓋甲﹝勿會﹞喘氣‧
為了驚影響到交通，猶佮這爿修，﹝辶乞﹞爿剪，互﹝人因﹞﹝勿會﹞大叢‧
為著加看到一寡仔青，只好佇茨尾頂創一個仔細細的花園仔‧
每工沃水，定期下肥、加土、翻盆仔土‧日長月久，嘛稍可仔有成一個樣囉！
匏仔、菜瓜、木瓜嘛有收成過‧四季的花種加減種‧
舊曆新年一過，櫻花枝頭來報春‧
今年雖然甘哪正十蕊那那，毋過，意思夠就好‧
續落去是杜鵑花開滿叢，大紅、粉紅和白色的相交參‧
逐種樹仔叢嘛一點一點佇吐新芽，看到是一片欣欣向榮的景觀‧
互人對將來的後一步，充滿著信心和希望‧
倚五日節的時，換龍吐珠和茉莉花開甲滿滿是‧
淡薄仔的茉莉花芳味，綴著微微仔風四界飄送，互人鼻到真輕爽‧
牽籐的龍吐珠湠開一大片，白色花蕊，紅絳絳的花心‧正經親像龍佇吐珠喔！
四季紅的九重葛，一年會當開幾仔擺花‧和幼幼細蕊的桂花共款‧
微微仔風那吹，桂花芳嘛四界散，這嘛是一種享受喔！
其他的草仔花，不時輪流開，只是時間攏無久‧不過，互細個花園仔佇歸片青綠中
參有五色彩的花蕊，卡﹝勿會﹞相單調無味‧
苦楝仔樹、青仔樹、萬年青、綠竹、蘭花、玫瑰花、鐵樹、﹝木羨﹞仔叢、枇杷、
拿菝仔、草莓、柑仔等等，攏嘛有種喔！甚至曇花和蓮花嘛有種過‧
幾年前，曇花有開過兩擺，曇花一現的開花到謝去的景致，實在真珍貴難得‧
秋風那起，樹葉嘛漸漸枯黃落落來‧這當陣就換聖誕紅準備出頭天囉！
天氣愈冷，開著愈嫷‧大紅的，粉黃的，一蕊一蕊搁一蕊‧
紅絳絳的花片，黃金色的花心，配合甲真拄好‧
尤其﹝足百﹞去茨尾頂看倒落來，歸片的紅聖誕紅真正嫷！
﹝人因﹞嘛攏擋到過年過，等櫻花來接班‧
頂禮拜去雲林縣古坑遊覽，嘛續手買2叢台灣的咖啡樹轉來種，期待幾年仔後，
會當佇花園仔﹝口林﹞到正港的台灣咖啡‧真正期待啊！
茨尾頂的細花園仔，就是阮修心養性、呼吸新鮮空氣的好所在‧
阮愛好好仔將伊保惜，繼續好好仔栽培伊‧
留言列表
