台語文~~~~~無奈的目神~~~~~遊子 
人講：病久床前無孝子‧台灣嘛綴著世界的潮流，已經進入老人社會囉！滿叨位攏看會到銀髮族的人，佇公園陪孫仔戲，佇街仔路行，佇樹仔跤坐涼、唱歌、開講，好跤好手
的時，看著是真幸福、好命的款；不過，抑是身體無康健，可能就完全無共啦，尤其行動無方便，需要人來服侍時，”病久床前無孝子”就應現啦！
蹛佇加護病房5A-36床的陳總經理，近80歲，伊動過2擺大手術，1擺割胃，1擺割腰子，又中風2擺，即擺，嘛是中風來入院，已經幾仔年囉！不過，最近已經幾仔工目睭無撥金，體溫1工攏會懸2擺，有時陣又是懸真濟，主治醫師、值班的加護病房醫師和護士，攏感覺真奇怪，因為，做過逐種細菌培養，攏是陰性的，表示無予細菌感染著才對；其他的臨床生化檢驗嘛攏是正常範圍，拄仔開始一段時間，有影是考倒醫師和護士啦！
佇16:00時，加護病房的門開囉！這是1工2擺予家屬、朋友入來探視病人的時間，家屬、朋友漸漸換好隔離衫，行倚隨人欲探視的人；1位外傭倚來陳總經理的床邊，倚過
伊的耳仔邊，用無講真滑溜的話喝講：阿公！阿公！你有卡好麼？恁囝無閒來，你有什麼事誌就對我講，我會轉予in，阿公！你的目睭撥金著好麼？外傭用双手扭著阿公枯焦的手骨，阿公的目睭皮連動一下嘛無‧外傭嘛毋知欲搁講什麼卡好‧1擺搁1擺，外傭會記著拄仔開始，阿公猶會拍開目睭，四箍輪轉看看著，看到別人濟少攏有親友來看，干哪伊即床是冷冷清清，有時陣，目箍含著目屎，忍著毋予流出來‧漸漸著無愛搁撥金啦！雖然，外傭心內真毋甘，嘛想無卡好的步數；毋管每工醫師和護士抑是外傭，大聲喝、溫柔細聲叫，伊的目睭皮就親像歹去的電視，一直無聲無影，無愛搁開機共款‧ 
後來，企佇邊仔看的護士，想到上尾擺阿公目睭撥金的目神，才雄雄悟著：阿公毋是無愛目睭撥金看人，應該是怨嘆後生和查某囝，攏將伊放sat啦！伊滿腹期待親人的溫情，
毋敢痟想in若有孝，踮身軀邊仔服侍伊，上無，嘛愛撥工來行踏關懷探視；結果，加護病房的門一開，冷風灌入來，予伊1擺搁1擺感覺真凊心啦！雖然，有請1位外傭陪佇病院，但是，外傭按怎嘛無法度替換至親的親情溫暖啊！
所以，阿公的目睭無愛搁撥金啦！每1擺的期待攏是失望，加護病房的門又開囉！對伊又有什麼意義？
留言列表
