台語文~~~~~第三的上好~~~~~遊子 2008.12.29.
前幾工佮幾個仔由國外返來台灣的朋友[口林]茶開講，講著國內外真濟無共的傳統風俗、政府制度等等‧當然，有好有bai2，有1好無2好啦！實在講無叨一爿才是絕對上好啦！
親像講：以一般家庭的傳統佮社會的福利制度來比評‧
外國家庭飼囝，到18歲以後就放鳥出籠，予伊去自由發展，自力更生，自力自強，未來欲好欲歹，看伊家己的拍拼佮選擇；茨內父母以企佇邊仔看的角色爾爾‧做父母的並無養兒防老的觀念，做囝兒的嘛無回頭飼歲數大的父母的觀念，所以，政府的養老福利制度愛完全，予一般人少年時食頭路趁錢，稅金[扌去]非常重，食老去養老院養老享受過日子，家己有茨的人就定期領養老金，予老來的生活免煩惱，毋免甲序細伸長手、看面色‧做囝兒的有時間亦是過節時，才去養老院亦是返去老父老母的茨見面團圓做伙，兩代中間感覺真自然，未歹勢‧
抑是，看華人這爿的傳統，做父母的責任，自嬰仔出世，捏仔捏，食奶的時、學爬學行的時、讀冊考試的時、畢業揣頭路的時、欲出國留學的時、欲娶嫁的時、孫子出世的時、財產欲按怎公平分配------等等，煩惱未續啦！這就是養兒防老的觀念，想講食老的時有序細來照顧咱；古早做序細的嘛較有烏鴉反哺的觀念，不過，俗語嘛有講：少年時是濟囝累死父，食老的時是濟囝餓死父‧
隨著時代環境得變遷，到現此時，全世界尤其佇經濟發達進步的國家，攏變成老人社會，少年人時行：慢婚、不婚、晏生、不生、生少---等等，猶有，少年人結婚後嘛是時行双薪趁錢，阿公阿媽鬥tshua7孫子，雖然，猶有養兒防老的觀念，不過，嘛漸漸愈來愈薄啦！
想到戰後出世的這代，現此時嘛差不多已經50~60歲囉！在座開講的朋友有人講：咱這代想欲養兒防老，看起來是真拼啦！老本、老伴、老友、健康，顧予好上要緊啦！欲靠山，山會倒；欲靠序細來照顧咱，不管有幾個囝仔，嘛無一定會可靠‧
這時陣，突然間聽到：”第三的”上好！”第三的”上可靠啦！
逐家雄雄聽到tshuah一tio5，有人講：什麼第三的上好！抑是，干哪生1~2個爾爾，是毋是佇外頭生第3個？
亦有人講：是有聽過第三的較食命、較好命，無聽過第三的上好啊！
續落聽到講：啊！袋佇衫仔內的上實在，上可靠，甘無影？
逐家才大聲笑講：對啦！對啦！有影是袋佇衫仔內的上實在，上可靠啦！
所以，”袋衫的”上好！”袋衫的”上可靠啦！
留言列表
